Milicia e Forcave të Shpejta të Mbështetjes raportohet se ka vrarë qindra civilë në spitalin kryesor të el-Fasherit, disa ditë pasi ka pushtuar qytetin sudanez, ka thënë drejtori i agjencisë së OKB-së për shëndetësi.
Tedros Adhanom Ghebreyesus deklaroi se Organizata Botërore e Shëndetësisë ishte “e tmerruar dhe thellësisht e tronditur” nga raportimet për vrasjen e 460 personave në spital.
Më herët, Rrjeti i Mjekëve të Sudanit tha se të martën luftëtarët e RSF-së “i vranë me gjakftohtësi të gjithë ata që gjetën brenda Spitalit Saudit, përfshirë pacientët, shoqëruesit e tyre dhe çdo person tjetër të pranishëm”, raporton BBCNews.
Rrjeti nuk dha shifra për viktimat, por tha se objektet mjekësore në qytet janë “shndërruar në thertore njerëzish”.
Po ashtu, Rrjeti i Mjekëve të Sudanit akuzoi RSF-në për rrëmbimin e gjashtë punonjësve mjekësorë, përfshirë katër mjekë, një farmacist dhe një infermiere, dhe raportoi se milicia po kërkon shpërblim mbi 150.000 dollarë për lirimin e tyre.
Sulmi i së martës ndaj Spitalit Saudit u raportua edhe nga Komiteti i Rezistencës së el-Fasherit, një grup aktivistësh lokalë, i cili tha se më pas mbretëroi “një heshtje e tmerrshme”.
Qyteti kishte qenë bastioni i fundit i ushtrisë në rajonin e Darfurit dhe u pushtua nga RSF-ja të dielën, pas një rrethimi 18-mujor të shënuar nga uria dhe bombardime të rënda.
Që nga shpërthimi i konfliktit në prill 2023, RSF-ja dhe milicitë arabe aleate në Darfur janë akuzuar për shënjestrimin e njerëzve nga grupet etnike jo-arabe, akuza që RSF-ja i mohon.
Me rënien e el-Fasherit, OKB-ja, aktivistët dhe agjencitë humanitare kanë shprehur frikë për fatin e rreth 250,000 njerëzve të bllokuar në qytet, shumë prej të cilëve janë nga komunitete jo-arabe.