Kryetari i Odës së Mjekëve të Kosovës, Dr. Pleurat Sejdiu, ka kërkuar falje në emër të këtij institucion për përjashtimin e përfaqësuesit të Gazetës Shneta, gazetarit Bujar Vitija, nga seanca në rastin e gjinekologut Ahmet Payasli.
“Me shqetësimin më të madh kemi kuptuar lidhur me përjashtimin e pjesëmarrjes tuaj nga seanca e shqyrtimit kryesor që është zhvilluar nga ana e Këshillit Etik të OMK-së. Para se gjithash, si Kryetar i OMK-së dua të besoj dhe të kuptoj një veprim të tillë nga ana e Kryetarit të Këshillit Etik si rrethanë presioni nga përgjegjësia dhe rëndësia e procedurave që po zhvillohen pranë organeve të OMK-së dhe mungesën e praktikës të cilën Këshilli Etik është duke e zhvilluar për herë të parë”, thuhet në letrën e Sejdiut.
Por Sejdiu këtë vendim e ka konsideruar si mungesë të koordinimit ndërmjet organeve të brendshme të OMK-së.
“Çështjen dhe shqetësimin e tillë për të cilën unë si Kryetar i OMK-së e ndaj me Ju, është pasojë e keqkoordinimit të brendshëm të organeve të caktuara të Odës”, thuhet ndër të tjera në letrën e Sejdiut.
Redaksia e Gazetës Shneta e vlerëson reagimin e Kryetarit të OMK-së, Dr. Pleurat Sejdiut, lidhur me këtë vendim arbitrar të Kryetarit të Këshillit Etik. Gazeta Shneta shpreson në bashkëpunim të mëtutjeshëm dhe transparencë nga organet e OMK-së kur bëhet fjalë për shkeljet e mundshme të mjekëve në Kosovë, qoftë të huaj apo vendor.
Letrën e plotë e gjeni më poshtë. /Gazeta Shneta/