Qendra Klinike Universitare ka njoftuar se oftalmologët e klinikës së syve po i ndihmojnë kolegët e tyre në spitalet e përgjithshme që të kryejnë operacione që nuk i kanë realizuar deri më tani.
“Me këtë projekt, Klinika e Syve synon të ngrisë nivelin e aftësimit profesional të spitaleve regjionale në fushën e oftalmologjisë dhe t’i mundësojë pacientit të marrë shërbime më afër vendbanimit”, thuhet në njoftimin e QKUK-së, transmeton Gazeta Shneta.
Njoftimi i plotë: Klinika e Syve ofron mbështetje për spitalet e përgjithshme
Klinika e Syve e Qendrës Klinike Universitare të Kosovës ka filluar të aplikojë projektin, që në thelb ka ofrimin e shërbimeve oftalmologjike me metoda moderne edhe në spitalet regjionale.
Një ekip prej mjekëve specialistë, javën e shkuar, në Spitalin e Prizrenit, ka operuar 6 pacientë, që kishin probleme me perden e syrit.
Me këtë projekt, Klinika e Syve synon të ngrisë nivelin e aftësimit profesional të spitaleve regjionale në fushën e oftalmologjisë dhe t’i mundësojë pacientit të marrë shërbime më afër vendbanimit.
Duke e konsideruar të nevojshme, mjekët e syve nga QKUK do të fillojnë prej muajit mars të implementojnë, gjithashtu, metodën e avastinës apo trajtimit me injeksione intraviterale në brendësinë e syrit në qytetin e Gjilanit, Mitrovicës dhe Prizrenit.