Konferenca e IV Ndërkombëtare e Fizioterapisë ka nisur punimet, duke shënuar një ngjarje të rëndësishme për komunitetin e fizioterapisë në Kosovë dhe më gjerë. Konferenca organizohet nga Oda e Fizioterapeutëve të Kosovës dhe këtë vit përkon me 10-vjetorin e themelimit të saj.
Në ceremoninë hapëse morën pjesë përfaqësues të institucioneve vendore dhe ndërkombëtare, figura të njohura të shëndetësisë, si dhe mysafirë nga organizata prestigjioze të fizioterapisë, përcjell Gazeta Shneta.
Kryetari i OFTK-së, Feim Gashi, në fjalën hyrëse theksoi rëndësinë e veçantë të kësaj konference, duke vlerësuar rrugëtimin 10-vjeçar të Odës së Fizioterapeutëve të Kosovës. Ai tha se gjatë kësaj dekade është punuar vazhdimisht për avancimin e profesionit, ngritjen e standardeve profesionale dhe fuqizimin e rolit të fizioterapeutëve në sistemin shëndetësor.
Ndërkaq, Bekim Haxhiu e cilësoi jubileun si dëshmi të përkushtimit dhe punës së palodhshme të profesionistëve të fizioterapisë në Kosovë. Ai rikujtoi se organizata nisi nga një ekip i vogël dhe sot numëron mbi 1200 anëtarë, duke falënderuar bashkëpunëtorët vendorë dhe ndërkombëtarë për kontributin në themelimin dhe zhvillimin e fizioterapisë në vend.
Presidenti i World Physiotherapy, Michel Landry, përgëzoi OFTK-në për arritjet dhe zhvillimin e madh të profesionit që nga viti 2001. Ai vlerësoi organizimin e konferencës dhe rolin e fizioterapisë në sistemin modern shëndetësor.
Po ashtu, Tim Nemeth shprehu kënaqësinë për pjesëmarrjen në konferencë, duke vlerësuar punën e OFTK-së në organizimin e ngjarjeve shkencore dhe profesionale.
Në konferencë folën edhe ish-ministrat e Shëndetësisë Ferid Agani dhe Armend Zemaj, të cilët vlerësuan kontributin e fizioterapeutëve në avancimin e kujdesit ndaj pacientëve dhe në trajtimin e pacientëve gjatë pandemisë Covid-19.
Ndërsa Hysni Bajrami theksoi suksesin e odave të profesionistëve shëndetësorë dhe kontributin e veçantë të Prof. Bekim Haxhiut në themelimin e OFTK-së.
Në fund të ceremonisë u ndanë mirënjohje për personalitete dhe profesionistë të fizioterapisë për kontributin e tyre në avancimin e profesionit në Kosovë. /Gazeta Shneta/