Shkencëtarët vazhdojnë të studiojnë ndikimin që stresi kronik mund të ketë në zhvillimin dhe përparimin e kancerit.
Sipas studiuesve, stresi afatgjatë shkakton ndryshime biologjike në organizëm, duke rritur nivelin e inflamacionit dhe duke ndikuar në funksionimin normal të sistemit imunitar, shkruan Cancer Research UK, transmeton Gazeta Shneta.
Këto ndryshime mund ta bëjnë trupin më të ndjeshëm ndaj sëmundjeve dhe të krijojnë kushte që favorizojnë zhvillimin e qelizave tumorale.
Eksperimentet laboratorike kanë treguar se hormonet e stresit, si kortizoli dhe adrenalina, mund të ndikojnë në mënyrën se si sillen qelizat në trup.
Në disa raste, ato lidhen me rritjen e inflamacionit, dëmtimin e mekanizmave mbrojtës të organizmit dhe përhapjen më të shpejtë të qelizave kancerogjene.
Megjithatë, studiuesit theksojnë se këto rezultate nuk do të thonë se stresi është shkak i drejtpërdrejtë i kancerit.
Sipas ekspertëve të Cancer Research UK, deri më tani nuk ka prova të mjaftueshme shkencore që të vërtetojnë se stresi vetëm mund të shkaktojë kancer.
Megjithatë, ai mund të ndikojë në progresionin e sëmundjes ose në mënyrën se si pacientët përballojnë trajtimin.
Gjithashtu, njerëzit që përjetojnë stres të vazhdueshëm mund të kenë më shumë gjasa të adoptojnë zakone jo të shëndetshme, si pirja e duhanit, konsumimi i alkoolit ose mungesa e aktivitetit fizik, të cilat njihen si faktorë rreziku për kancerin.
Ekspertët rekomandojnë menaxhimin e stresit përmes aktivitetit fizik, gjumit të rregullt, teknikave të relaksimit dhe mbështetjes psikologjike, pasi këto masa ndihmojnë në ruajtjen e shëndetit të përgjithshëm dhe mirëqenies emocionale. /Gazeta Shneta/