Ekrem Hyseni, onkolog dhe ish-deputet i Lidhjes Demokratike të Kosovës ka dal me disa kritika ndaj Qeverisë dhe ministrit të Shëndetësisë Rifat Latifi.
Hyseni ka thënë se paaftësia e Qeverisë është duke dëmtuar shëndetin e qytetarëve, duke i lënë pa shërbime shëndetësore, barna e investime kapitale.
“Është kjo Qeveri që javë më parë nuk ua vazhdoi kontratat mbi 1,000 pjesëtarëve të stafit mbështetës në luftën kundër pandemisë. Në kohën e kësaj Qeverie, përkatësisht në periudhën janar – maj 2022, mbi 520 qytetarë tanë kanë kërkuar shërim jashtë vendit. Në kohën e kësaj Qeverie, në QKUK, janë vetëm 48 anesteziologë, të cilët duhet të shërbejnë për 44 njësi – pra as dy sosh për njësi operuese”, ka shkruar Hyseni.
Ai ka thënë se ministri Latifi kishte deklaruar më parë se do të dorëhiqej nëse dështon, por sipas Hysenit vetëm ministri dhe Qeveria nuk po e shohin dështimin në shëndetësi.
“Nëse këta që kanë dështuar vendosin edhe ta pranojnë dështimin, i bie që ministri në fjalë mjaftohet me ikje nga vendi”, ka shkruar Hyseni.
Lexoni më poshtë postimin e tij të plotë:
Të nderuar qytetarë,
Paaftësia e kësaj Qeverie është duke dëmtuar seriozisht shëndetin e qytetarëve.
– Paaftësia qeverisëse po i lë qytetarët pa shërbime shëndetësore.
– Profesionistët shëndetësorë po i trajton me lëmoshë, gjersa investimet kapitale në këtë fushë janë realizuar vetëm 5%.
– Është kjo Qeveri që profesionistët shëndetësorë vazhdon t’i trajtoj me lëmoshë, gjersa vetëm për pak kohë mbi 120 profesionistë shëndetësorë kanë lënë vendin, ndër ta edhe 40 specializantë.
– Është kjo Qeveri që javë më parë nuk ua vazhdoi kontratat mbi 1,000 pjesëtarëve të stafit mbështetës në luftën kundër pandemisë.
– Në kohën e kësaj Qeverie, përkatësisht në periudhën janar – maj 2022, mbi 520 qytetarë tanë kanë kërkuar shërim jashtë vendit.
– Në kohën e kësaj Qeverie, në QKUK, janë vetëm 48 anesteziologë, të cilët duhet të shërbejnë për 44 njësi – pra as dy sosh për njësi operuese.
– Në kohën e kësaj Qeverie, janë stërzgjatur listat e pritjes së qytetarëve për të marrë shërbimet shëndetësore, duke mbërritur deri në mesin e vitit 2023.
– Në kohën e kësaj Qeverie, mungesa e barnave në listën esenciale tashmë është bërë e zakonshme, me theks të veçantë shumë prej ilaçeve për sëmundjet malinje të cilat janë të domosdoshme për mjekimin e kësaj sëmundje të rëndë.
– Në kohën e kësaj Qeverie, sipas KDI-së, Ministria e Shëndetësisë paguan 280% më shtrenjtë 1gr Paracetamol për injeksion në krahasim me vlerën e tregut me pakicë.
– Në kohën e kësaj Qeverie është ulë buxhetin për Ministrinë e Shëndetësisë për rreth 60 milion euro.
– Në Ministrinë e Shëndetësisë, nga 15 projekte kapitale, kanë nisur vetëm 2 prej tyre, dhe atë në vlera minimale. Në këtë ministri, gjatë këtyre 6 muajve, janë shpenzuar vetëm 5 % nga buxheti për investime kapitale, më saktësisht, nga 10,063,000 euro janë shpenzuar vetëm 530,702 euro.
– Në kohën e kësaj Qeverie dominon arroganca, mosveprimi, propaganda, jo dëgjueshmëria profesionale, tipare këto të qeverisjeve të paafta dhe populiste, ndaj dhe kjo qeveri nuk bën përjashtim me sjelljen e saj.
– Në kohën e kësaj Qeverie, përkundër të gjithave e gjithçkaje, ne si parti opozitare kemi ofruar Ligjin për Shëndetësinë, në mënyrë që t’ju dalim në mbrojtje qytetarëve dhe profesionistëve shëndetësor, ndërsa si kundërpërgjigje kemi marrë padëgjueshmërinë.
– Kjo Qeveri e përjashton një Ligj të gatshëm vetëm e vetëm se e ka ofruar opozita, duke humbur kështu kohë për më shumë se një vit.
– Këto janë vetëm disa nga dështimet e fundit të kësaj Qeverie, që e bëjnë epilogun e tmerrshëm në fushën e shëndetësisë, ku burim parësor definitivisht e kanë paaftësinë.
– Mos të harrojmë se, kohë më parë, Ministri i Shëndetësisë, ka deklaruar se në rast dështimi ai kthehet nga ka ardhur.
– Së pari është e frikshme se si vetëm ai dhe Qeveria e tij nuk po e sheh dështimin e tyre të thellë edhe në shëndetësi.
– Së dyti, nëse këta që kanë dështuar vendosin edhe ta pranojnë dështimin, i bie që ministri në fjalë mjaftohet me ikje nga vendi.
– Kësaj Qeverie, edhe sot i bëjmë thirrje dhe i themi që: provo për të dëgjuar, provo për të mësuar dhe në fund për të punuar, ndryshe do të mbeteni vula e dështimit dhe dëmtimit të shëndetit të krejt qytetarëve të vendit.