Kryetarja e Federatës së Sindikatave të Shëndetësisë Tevide Imeri, ka treguar se kush pati pakënaqësi me pagat sipas Ligjit të ri.
Pagat në shëndetësi janë paguar sipas Ligjit të ri të Pagave gjatë ditës së djeshme dhe sot, shkruan Gazeta Shneta.
Gazeta ka biseduar me kryetaren e Federatës së Sindikatave të Shëndetësisë Tevide Imeri, për të mësuar nëse ka pasur pakënaqësi në mesin e punëtorëve shëndetësorë.
Imeri ka treguar se ka pranuar pakënaqësi vetëm nga dy kategori e punëtorëve.
“Ka pasur pakënaqësi nga asistentët e stomatologjisë të cilët janë kategorizuar gabimisht si ndihmës-infermierë, si dhe nga disa vozitës të cilët po ashtu janë kategorizuar gabimisht si punonjës teknik. Poashtu janë shprehur pakënaqësi edhe për ndaljen e pagesës së shujtës në nivelin primar, ndërsa në sekondar dhe terciar shujta është paguar. Por për këtë çështje ne i kemi njoftuar me kohë anëtarët tanë. Në fund të javës do të kemi një takim me ministrin e Shëndetësisë dhe do ta adresojmë këtë çështje”, ka deklaruar Imeri.
Ajo ka thënë se pagesat për kujdestari kanë mbetur njëjtë si më parë, ndërsa ka bërë të ditur se paga e një infermieri me shkollë të mesme nga 377 Euro është rritur në mbi 500 Euro. /Gazeta Shneta/