Një studim i fundit ka zbuluar se pagjumësia mund të çojë në probleme serioze shëndetësore, përfshirë sëmundje të zemrës, duke shkaktuar rritje të niveleve të stresit, hormoneve dhe inflamacionit, faktorë që janë të lidhur me rrezikun për zhvillimin e problemeve kardiovaskulare.
Dr. Julio Fernandez-Mendoza, ekspert i psikiatrisë dhe shëndetit mendor, rekomandon që të rriturit të flenë 7 deri në 8 orë gjumë çdo natë për të mbajtur shëndetin fizik dhe mendor në nivele optimale, ndërsa adoleshentët kanë nevojë për më shumë gjumë, të paktën 9 orë, trasnmeton Gazeta Shneta.
Ai sugjeron gjithashtu disa praktika për të përmirësuar cilësinë e gjumit, përfshirë uljen e konsumit të kafeinës dhe alkoolit, ushtrime fizike dhe ndryshime në zakonet e gjumit, si ngritja në të njëjtën orë çdo ditë dhe përdorimi i shtratit vetëm për gjumë dhe aktivitet seksual.
Për adoleshentët, ai sugjeron përshtatjen e orarit të zgjimit për të përmirësuar cilësinë e gjumit, pasi trupi i tyre ka një orë biologjike që ndryshon gjatë pubertetit. Nëse këto ndryshime nuk ndihmojnë, Dr. Fernandez-Mendoza këshillon konsultimin me një specialist të shëndetit të gjumit për trajtime të tjera, si terapia kognitive dhe përdorimi i dritës terapeutike.