Një studim i ri shkencor ka ngritur shqetësime serioze mbi sigurinë e paketimit të ushqimit që përdoret çdo ditë.
Sipas hulumtimit, ushqimi i shitur në mbështjellës plastikë, tabaka kartoni apo enë letre mund të përmbajë rreth 200 kimikate që lidhen drejtpërdrejt me rrezikun e kancerit të gjirit. Studimi u publikua në revistën shkencore “Frontiers in Toxicology”, shkruan burimi Health Day përcjell Gazeta Shneta.
Studiuesit zbuluan se materialet e paketimit të ushqimit përmbajnë gjithsej 189 kimikate potencialisht të rrezikshme për shëndetin e grave.
Ndër më problematiket përfshihen PFAS, bisfenolet dhe ftalatet, substanca që mund të lëvizin nga paketimi drejt ushqimit dhe më pas të përfundojnë në organizmin e njeriut përmes konsumit të përditshëm.
Sipas studiueses Jane Muncke, ky studim është i rëndësishëm sepse tregon se ekziston një mundësi reale për të parandaluar ekspozimin e njerëzve ndaj kimikateve që nxisin kancerin e gjirit.
Të dhënat janë mbledhur nga Forumi i Paketimit të Ushqimit, i cili ka krijuar një bazë të gjerë informacioni nga mijëra studime shkencore ndërkombëtare.
Rezultatet tregojnë se 143 kimikate të lidhura me kancerin e gjirit gjenden në paketimet plastike, ndërsa 89 të tjera në letër dhe karton. Alarmante është fakti se njerëzit janë të ekspozuar rregullisht ndaj të paktën 76 prej këtyre kimikateve përmes dietës ushqimore, pavarësisht rregulloreve ekzistuese në SHBA, Bashkimin Evropian dhe vende të tjera.
Studimi është publikuar edhe në “Journal of Exposure Science & Environmental Epidemiology”. /Gazeta Shneta/