“Ata që kanë sy e vesh me pa, ndërrimet po ndodhin. Pacientët tanë s’kanë me pas ma nevojë me kërku ndihmë dikund tjetër”. Kjo është deklarata e drejtoreshës së Pulmologjisë Dr. Rukije Mehmeti, në një video të publikuar nga QKUK një muaj më parë ku promovohen investimet në këtë klinikë. QKUK nuk ka bërë të ditur sa para janë shpenzuar për renovim, por në video shihet se është rinovuar dyshemeja, dyert, janë lyer muret si dhe pajisje të reja.
Për ironi të kësaj deklarate të Mehmetit, një pacient i Pulmologjisë u detyrua të kërkojë ndihmë për shërim pasi mbrëmë gjatë natës i ra tavani mbi kokë duke ia rrezikuar jetën nga punimet e dobëta gjatë rinovimit. Kjo ndodhi pak më shumë se një muaj pas publikimit të kësaj video nga menaxhmenti i QKUK-së, shkruan Gazeta Shneta.
Mesnatën e së enjtes atij i ra mbi kokë një pjesë e tavanit të dhomës numër katër të katit të dytë të klinikës së Pulmologjisë së QKUK’së. Nga shembja atij iu shkaktuan lëndime jo të lehta trupore. Pjesë të tavanit i ranë në kokë atij duke ia dëmtuar kështu syrin e majtë, fytin si dhe lëndime ka marrë në dorën e djathtë.
Madje, nga shembja, pacienti i lënduar i është nënshtruar edhe një intervenimi kirurgjik në pjesën e poshtme të syrit. 82-vjeçari, ka shpjeguar për Gazetën Express se për disa kohë kishte qenë pa vetëdije. Thotë se ngjarja ka ndodhur në orën 1 të mesnatës që e lamë pas.
“Njëherë kam bërtitur. Më ka ndëgjue motra, pastaj kam mbet pa vetëdije. Me rridhte gjak shumë. Pasi më ka ardhur pak vetëdija e kom pa që me kanë pa (mjekët), ma kanë ndal pak gjakun. Pastaj e di që më kanë çu në tjetër spital prej orës 1 të natës deri në 4 kom nejtë në sallë”, shpjegon për rastin ai. Ai thotë se për dy javë kishte qëndruar në dhomën A4. Aty ku ndodhi shembja e tavanit.
“Më së fundi ma kanë qep syrin. Unë që dy javë ditë kam qëndru në atë dhomë. Pak ujë rridhte te çeshmja”, tregon tutje pacienti i lënduar, B.Vllasaliu.
E lëndimet që i mori në QKUK pacienti që po kërkonte shërim aty, zyra e drejtorit të këtij institucioni shëndetësor, Basri Sejdiut, nuk i ka cilësuar si serioze.