Pas raportimit për keqpërdorimin e autoambulancës së Spitalit të Mitrovicës, njëri nga shoferët, Bajram Ferati, e ka kërcënuar gazetaren e Gazetës Shneta, Diellza Luzha.
Gazetarja Diellza Luzha ka raportuar sot përmes një artikulli për keqpërdorimin e autoambulancës në Spitalin e Mitrovicës. Për këtë shkrim, Luzha është kërcënuar nga njëri prej shoferëve, Bajram Ferati.
Ferati është kontaktuar fillimisht nga gazetarja për të marr një sqarim në lidhje me keqpërdorimin e autoambulancës, por ai nuk ka pranuar të flas. Ndërkaq pas publikimit të artikullit, ai e ka kontaktuar gazetaren duke e kërcënuar dhe ofenduar.
“Ngom mirë. 15 herë unë me marr autoambulancën, bonu e bindur që nuk ke me thirr ma kërkon. A u kuptuam”, ka kërcënuar Ferati. “Unë e kam marr autoambulancën dhe apet e marr”, ka deklaruar ai në bisedën me gazetaren, e cila është e incizuar.
Gazetarja Luzha ka raportuar sot përmes një artikulli ku shoferët e kanë përdorur autoambulancën për të shkuar në fshatin Bare të Mitrovicës së Jugut, për të marr nënën e Feratit. Këtë e ka pohuar edhe vet drejtoresha e Spitalit Luljeta Zhubi.
“Vozitësi në ndrrim e ka dërguar vozitësin tjetër me marrë nënën e tij dhe me e sjelle në spital që paska qenë e sëmurë dhe ka qenë me vendbanim në fshatin Bare. Kanë shku dy vozitsat, njëri që ka qenë ne ndrrim tjetri e ka pasë nënën të sëmurë. Ka shku me autoambulancë pasi që paska deshtë me i ndihmu kolegut e me pru nanën në spital”, ka deklaruar drejtoresha.
Shoferi e shfrytëzon autoambulancën e Spitalit të Mitrovicës për nevoja familjare – VIDEO
Autoambulancat e spitaleve rajonale shfrytëzohen për nevoja të spitaleve dhe për transportimin e rasteve të pacientëve në Qendrën Klinike Universitare, ndërkaq transportin e pacientëve nga shtëpia e bëjnë institucionet e shërbimit urgjent mjekësor të mjekësisë familjare. /Gazeta Shneta/