Agjencia Kundër Korrupsion ka gjetur shkelje të Nenit 13 paragrafi 1 të Ligjit nr.06/L- 001 për parandalim të konfliktit të interesit në rastin e Drejtoreshës së Klinikës së Kirurgjisë Plastike, Violeta Zatriqi, pas raportimit të Gazetës Shneta.
Zatriqi përveç pozitës së drejtoreshës në këtë klinikë ajo të njejtën pozitë e mbante edhe në klinikën private “Poliklinika Zatriqi Sh.P.K”, gjë që sipas AKK-së një gjë e tillë përbën konflikt interesi.
Në njoftimin e Agjencisë thuhet se pas konfirmimit të informacioneve fillimisht e kanë njoftuar zyrtarën e lartë me një shkresë për fillimin e shqyrtimit të gjendjes së mundshme për konflikt interesi e cila po ashtu është njoftuar se mbajtja e pozitës menaxheriale në një klinikë publike dhe private përmbanë konflikt interesi.
Gjatë këtij takimi, sipas njoftimit të AKK-së, drejtoresha e klinikës ka theksuar se nuk ka qenë në dijeni në lidhje me kufizime të tilla dhe ka marrë menjëherë masa për të parandaluar një shkelje të tillë.
“Na ka njoftuar se ka ndërmarrë veprimet e nevojshme dhe ka hequr dorë nga funksioni menaxhues si drejtoreshë e klinikës private “Poliklinika Zatriqi Sh.P.K” “, thuhet gjithashtu në njoftimin e Agjencisë për Gazetën Shneta.
Gazeta Shneta më 13 prill të këtij viti pati raportuar në lidhje me këtë rast, pas raportimit Agjencia Kundër Korrupsion pati inicuar procedurë për të konstatuar nëse një gjë e tillë përmbanë konflikt interesi.
Mbajtja e dy pozitave menaxhuese në të njejtën kohë nga drejtorët e klinikave dhe spitaleve është “trendi” në Kosovë. Dy vite më parë Agjencia Kundër Korrupsion pati detyruar të dorëhiqen nga bizneset privat dy drejtorë të klinikave në QKUK, Imri Jasharin, ish drejtorin e Kardiologjisë dhe Venera Berisha – Muharremin drejtoresh në Endrokrinologjisë në QKUK.
AKK poashtu pati detyruar të dorëhiqet nga dy organizata jo qeveritare edhe drejtorin e Institutit Kombëtar të Shëndetësisë Publike, Naser Ramadanin. /Gazeta Shneta/