Shërbimi Spitalor Klinik Universitar ka shkelur kontratën për furnizim me gazra me afër 75 mijë euro. Kjo është e gjetura e Zyrës Kombëtare të Auditimit për vitin 2018
Në shtator të vitit 2017 në Qendrën Klinike Universitare të Kosovës ndodhi një nga skandalet më të rënda në historinë e shëndetësisë. Ndërruan jetë në mënyrë të dyshimtë tre pacientë në të njëjtën kohë sa ishin në sallat e operacionit. Dyshimet e para ishte cilësia e gazit oksidul, për çka u arrestua edhe pronari i kompanisë që furnizonte QKUK-në, shkruan Gazeta Shneta.
Pas këtij skandali me një vendim të Qeverisë së Kosovës, QKUK bëri një kontratë për furnizim emergjent me gazra medicinale. Kontrata do të zgjaste 6 muaj dhe kishte vlerë të caktuar prej 257,828 euro. Por QKUK e ka tejkaluar jashtëligjshëm këtë vlerë.
Të paktën kjo është e gjetura e Zyrës Kombëtare të Auditimit në raportin për vitin 2018.
“Paragrafi 1 i nenit 2 të kontratës 6 mujore për ‘Furnizim emergjent me gazra medicinale’ në vlerë 257,828€ e lidhur më 29.09.2017, përcakton ‘çmimi total i furnizimeve duhet të jetë 257,828€’. Po ashtu, paragrafi 2 i nenit 2 të kësaj kontrate përcakton se ‘çmimi i përmendur në paragrafin 2.1 duhet të jetë e vetmja pagesë të cilën Autoriteti kontraktues i ka borxh ofruesit të shërbimeve. Ai duhet të jetë i plotë dhe të mos i nënshtrohet ndryshimeve’. Ne kemi vërejtur se ShSKUK kishte tejkaluar vlerën e kontratës për 74,425€”, thuhet në raportin e ZKA-së.
Sipas raportit, kjo kishte ndodhur për shkakun se komisioni prej katër anëtarëve i caktuar si komision për menaxhimin e kësaj kontrate, kishte bërë mbikëqyrjen e furnizimeve të gazit vetëm për furnizimet e kryera në QKUK, por jo edhe në Spitalet e Përgjithshme.
“Mungesa e mbikëqyrjes së plotë dhe të duhur për furnizimet nga komisioni i menaxhimit të kontratës, ka shkaktuar tejkalim të furnizimeve duke sjellë rrezik që të kryhen pagesa të parregullta dhe potencialisht më të larta sesa mund t’i kishte ofruar tregu aktual”, thuhet në raportin e ZKA-së. /Gazeta Shneta/