Drejtorët e spitaleve rajonale në kuadër të Shërbimit Spitalor Klinik Universitar kanë deklaruar pasurinë e tyre në Agjencionin Kundër Korrupsion.
Gazeta ka bërë përmbledhje të katër drejtorëve të spitaleve të Prizrenit, Ferizajt, Gjakovës dhe Pejës. Në tre spitalet tjera, Vushtrri, Mitrovicë dhe Gjilan janë ndërruar drejtorët.
Afrim Avdaj, drejtor në Spitalin e Prizrenit, ka deklaruar tre vende pune si drejtor i këtij institucioni, kirurg në spital, si dhe ligjërues në kolegjin Rezonanca. Përveç që është drejtor, Avdaj mban edhe kujdestari në spital ku pagën e tij vjetore e ka deklaruar 20 mijë e 366 euro, ndërsa në Rezonanca paguhet me mbi 12 mijë euro, shkruan Gazeta Shneta.
Avdaj ka deklaruar një shtëpi dhe një truall në emër të tij në vlerë 280 mijë euro, ndërsa një banesë dhe pesë parcela toke të përbashkëta. Ai ka para të gatshme në bankë rreth 30 mijë euro në llogarinë e tij, ndërsa 19 mijë euro i ka deklaruar në emrin e bashkëshortes.
Skender Dreshaj, drejtor në Spitalin e Pejës, ka deklaruar tri banesa në emrin e tij në vlerë afër 120 mijë euro, ndërsa ambulancën dhe një truall si pasuri e përbashkët. Ai ka deklaruar dy ultrazë, njërin 5 mijë e tjetrin 9700 euro, si dhe veturë në vlerë 5 mijë euro si pasuri e luajtshme.
Dreshaj mban në bankë 9500 euro para të gatshme. Ai ka deklaruar mbi 16 mijë euro pagë vjetore në spital, 8400 euro nga kolegji UBT, si dhe 3 mijë euro nga Poliklinika “Dr. Dresha”.
Jeton Zeqiri, drejtor i Spitalit të Ferizajt, përveç udhëheqjes së këtij institucioni punon edhe si anesteziolog në spitalin privat “Eye Hospital”, si dhe në kolegjin UBT. Ai ka deklaruar pagën 935 euro në spitalin e Ferizajt, si dhe nga 350 euro kujdestari. Në spitalin privat paguhet me 200 euro, ndërsa në UBT me 160. Zeqiri ka deklaruar edhe marrjen e një qiraje në vlerë 400 euro.
Pasuri të patundshme Zeqiri ka deklaruar një shtëpi, një banesë dhe tokë, të gjitha në vlerë 620 mijë euro. Ai vozitë veturë në vlerë 20 mijë euro, ndërsa ka para të gatshme në bankë mbi 7 mijë euro. Zeqiri ka deklaruar kredi në vlerë 20 mijë euro për blerjen e veturës.
Hilmi Shala, drejtor në Spitalin e Gjakovës, ka deklaruar vetëm një pagë si drejtor në këtë institucion në vlerë vjetore 14,636 euro. Shala ka deklaruar 11 prona të paluajtshme, të gjitha si prona të përbashkëta të cilat kapin shumën totale mbi 292 mijë euro.
Shala ka deklaruar se vozitë veturë në vlerë 9500 euro, ndërsa ka deklaruar edhe dy biznese “Shala Pharm” dhe “Ipsum” ku mban aksione bashkëshortja e tij. Ai ka 8400 euro para të gatshme në bankë dhe një kredi në vlerë 15 mijë euro për hapjen e biznesit të bashkëshortes.
Gazeta ditë më parë ka publikuar edhe pasurinë e drejtorëve të klinikave në QKUK. /Gazeta Shneta/
Pasanikët e QKUK-së, kjo është vlera e pasurisë së drejtorëve të klinikave