Ditët e fundit janë krijuar polemika nga një pjesë e prindërve në kryeqytet për menynë e re në çerdhe. Mjekja pediatre Mimoza Çabiri tregon për ushqimet e domosdoshme që duhet të hajë një fëmijë që të rritet i shëndetshëm.
Mjekja ka shpjeguar si duhet të nisë ushqyerja e fëmijëve pas muajit të 6-të, kohë kur ata mund të pranohen në çerdhe. E rëndësishme sipas pediatres është një shumëllojshmëri perimesh.
“Zakonisht fillohet me një muhalebi ose pure patate. Pas puresë së patates, çdo 4-5 ditë shtohet një zarzavat i ri dhe fëmija quhet i ushqyer në qoftë se në një vakt merr sa më shumë zarzavate. Ndërsa lëngun e mishit bashkë me mishin e fillojmë në muajin e 8-të dhe rekomandojmë dy herë në javë mish të kuq, dy herë mish pule dhe dy herë peshk. Vezën e fillojmë mbi 1 vjeç, dy herë në javë, jo më shumë për shkak të kolesterolit që ka”, thotë pediatrja Mimoza Çabiri për Ora News.
Pediatrja rekomandon që supa e cila duhet të jetë me një shumëllojshmëri perimesh, të gatuhet me vaj ulliri, por për fëmijët para moshës 1-vjeçare është i rëndësishëm edhe përdorimi i gjalpit të freksët.
“Suprat e zarzavateve zakonisht bëhen me vaj ulliri, një ditë me vaj ulliri një ditë me gjalpë. Gjalpi është gabim që nuk përdoret 6 muaj deri në 1 vjeç sepse ndikon në zhvillimin e trurit. Ne i këshillojmë nënat që një ditë të përdorin një lugë kafe vaj ulliri, një ditë tjetër do përdorin një lugë kafe gjalpë të freskët. Ne fusim në supë thjerrëzat, bizelet, fasulet, nga të gjitha zarzavatet nga pak, por të shumëllojshme, sa më shumë ngjyra sa më shumë shumëllojshmëri”
Çabiri pohon se në ushqimin e fëmijëve nuk duhet të mungojnë drithërat, veçanërisht orizi dhe makaronat.
“Fëmija, të gjitha llojet e drithërave mund t’i marrë, por i rëndësishëm është mielli i grurit dhe mielli i orizit, domethënë makaronat dhe orizi që duhet t’i marrë një ditë po një ditë jo, sepse edhe miellrat janë shumë të rëndësishëm në zhvillimin e fëmijës përveç qumështit, kosit, djathit, mishrave dhe vezës,” shprehet pediatrja.
Sa i takon frutave, pediatrja rekomandon që ato të përdoren dy herë në ditë, kryesisht në formën e lëngjeve. Në piramidën ushqimore të OBSH për fëmijët dominojnë zarzavatet, proteinat që mund të merren nga mishi, veza dhe familja e legumeve ku bëjnë pjesë fasulet, thjerrëzat etj., ndërsa karbohidratet janë në më të reduktuara. Një raport i fundit i OBSH tregon se prevalenca e obezitet po rritet frikshëm edhe në Shqipëri.
Ushqimi i shëndetshëm është një mënyrë shumë e mirë për të parandaluar obezitetin dhe sëmundjet që varen edhe nga llojet dhe sasia e ushqimeve.