Për tre muaj në Klinikën e Neurokirurgjisë u kryen 122 operacione

2017-04-06 në ora 12:00

Në Klinikën e Neurokirurgjisë të Qendrës Klinike Universitare të Kosovës, si pjesë e Shërbimit Spitalor dhe Klinik Universitar të Kosovës, në tremujorin e parë të këtij viti janë kryer 122 operacione neurokirurgjike dhe 1.110 vizita ambulantore, thuhet në një njoftim për media.

“Asnjë nga pacientët nuk ka pasur nevojë për trajtim kirurgjik jashtë vendit”.

“Nga numri i përgjithshëm i operacioneve, përveç atyre rutinore neurokiururgjike, janë bërë operime kulmore neurokirurgjike me sukses si; proceset ekspansive (tumore të bazës së kokës) tumore intra dhe suprasellare (makroadenoma të hipofizës) Aneurysma të arterieve cerebrale, aq më tepër multiple me një akt operativ, malformime arteriovenoze (MAV) në tru me dimensione shumë të mëdha dhe me lokalizim të thellë.

E gjithë kjo punë është bërë nga gjithsej 35punëtorë, nga ta 11 neurokirurgë specialistë, 2 mjekë në specializim (specializantë) si dhe 25 Infermier/e.

Në klinikë janë trajtuar edhe rastet e gjakderdhjeve intrakraniale, epidurale, subdurale, intracerebrale dhe intraventrikulare, patologjitë cerebrovaskulare, aneurizmat, MAV dhe angiomat, patologjitë e kolonës spinale, proceset ekspanzive intraspinale dhe hernitë diskale të tërë aksit spinal”.