Pakënaqesitë e tyre për koeficientin e punës, Sindikata e Infermierëve të Kosovës po i shpreh tash e disa ditë, por në takimin që u mbajt në Klinikën e Kirurgjisë ishin prezentë edhe pjesëmarrës të shoqatave të tjera.
Takim ky i cili mblodhi shoqatat e profesionistëve shëndetësor, ku prezentë ishin Oda e Infermierëve të Kosovës, Shoqata e Infermierëve të Urologjisë, Shoqata e Instrumentareve të Kosovës, Shoqata e Infermierëve të Psikiatrisë së Kosovës, Përfaqësues Regjional, Përfaqësues nga Qendra Klinike Universitare e Kosovës.
Në fund të takimit u bë e ditur që të gjitha institucionet, shoqatat si dhe Sindikata e Infermierëve të nënshkruanin një komunikatë të përbashkët për medie përmes së cilës deklaruan që do mbështeten të gjitha masat dhe veprimet sindikale të cilat do të ndërmerren nga Sindikata e Infermierëve të Kosovës lidhur me kundërshtimin e diskriminimit në koeficient të pagave dhe Ligjin e Pagave.
“Për datën, kohën dhe modalitetet e veprimeve dhe masave sindikale, paraprakisht do konsultohen institucionet nënshkruese të komunikatës së përbashkët, OIK dhe Shoqatat e profesionistëve shëndetësor”, u tha në komunikatë për media.
Sindikata e Infermierëve të Kosovës gjatë ditës së nesërme do konsultoj organet e saja, Kryesinë, Këshillin Drejtues dhe Këshillin për Protesta dhe Greva në mënyrë që gjatë ditës së mërkurë 16 shkurt, t’ua dërgoj propozimin e veprimeve dhe masave sindikale OIK dhe Shoqatave të profesionistëve.