Përfaqësues të organizatave dhe këshillave të pacientëve nga e gjithë Kosova u mblodhën dje në ditën e parë të një punëtorie të dedikuar për ngritjen e fondeve dhe planifikimin strategjik të organizatave që veprojnë në fushën e mbrojtjes së të drejtave të pacientëve.
Gjatë ditës së parë, pjesëmarrësit u fokusuan në shqyrtimin e peizazhit aktual të financimit në sektorin shëndetësor, identitetin organizativ dhe mënyrën se si perceptohet puna e tyre në publik.
Pjesë e rëndësishme e punëtorisë ishte edhe eksplorimi i teknikave të rrëfimit me ndikim (“storytelling for impact”), të cilat u vlerësuan si mjete të fuqishme për ndërtimin e besimit dhe angazhimin e përkrahësve, partnerëve dhe donatorëve.
Sipas njoftimit, pjesëmarrësit reflektuan mbi rolin e tyre në mbështetjen e pacientëve dhe nisën hartimin e “propozimit të vlerave”, me qëllim që zëri i organizatave të shprehet qartë dhe me autenticitet për komunitetin që përfaqësojnë.
Punëtoria pritet të vazhdojë edhe sot me tema të tjera të rëndësishme për forcimin e kapaciteteve të organizatave të pacientëve./Gazeta Shneta/