Bordi Drejtues i Shërbimit Spitalor Klinik Universitar nuk e ka aprovuar raportin e punës janar-qershor. Kryesuesi i Bordit ka thënë se në bazë të këtij raporti SHSKUK ka pasur performancë të keqe.
Bordi Drejtues i SHSKUK-së me kryesues Naim Bardiqi dhe anëtarët Dren Boshnjaku, Tetore Olloni, Enver Gashi, Besim Demolli dhe Vjollca Kadolli kanë votuar për mos aprovimin e raportit të punës të këtij institucioni në periudhën janar-qershor të këtij viti, shkruan Gazeta Shneta.
Kryesuesi i Bordit Bardiqi ka thënë se performanca e SHSKUK-së gjatë kësaj periudhe ka qenë e keqe, nuk janë shfrytëzuar të gjitha kapacitetet dhe është tentuar të fshihet mos puna. Madje sipas tij ka pasur edhe keqmenaxhim të parasë publike në spitalet e përgjithshme.
Për këtë arsye Bardiqi ka rekomanduar të mosaprovohet raporti, për çka u votua unanimisht edhe nga anëtarët tjerë të Bordit përveç Rrezarta Bajramit e cila ka munguar në mbledhjen e sotme.
Draft-raporti ishte prezantuar edhe në një mbledhje tjetër të Bordit por ishte kthyer mbrapsht me kërkesë për t’u ndryshuar meqë të dhënat nuk ishin verifikuar.
Bordi aktual është emëruar nga Qeveria e Kosovës më 26 prill të këtij viti, pasi bordit të kaluar i kishte skaduar mandati në mars. Ndërkaq nga janari deri në korrik SHSKUK është udhëhequr nga Narqize Arenliu-Hoxha e cila është drejtoreshë në Spitalin e Prizrenit. Ajo kishte ardhur në këtë pozitë si zëvendësuese e drejtoreshës deri në shpalljen e konkursit. Pas konkursit drejtor u zgjodh Elvir Azizi. /Gazeta Shneta/