Reparti i renovuar i Pulmologjisë, Laboratori i Patologjisë dhe pjesës së renovuar të Radiologjisë janë përuruar sot në Spitalin Rajonal të Gjilanit në pranin e Ministrit të Shëndetësisë, Rifat Latifi.
Spitali i Përgjithshëm në Gjilan për herë të parë do të bëhet me Laborator të Patologjisë.
Përmes një njoftimi të Ministrisë së Shëndetësisë thuhet se një rinovim i tillë është bërë me ndihmën e Qeverisë së Luksemburgut.
“Ky monument është shumë i rëndësishëm edhe për përmirësimin e kushteve të punës për mjekët, infermierë dhe stafin mbështetës, e njëkohësisht edhe për shërbime sa më të mira për qytetarët e Gjilanit me rrethinë. E gjitha kjo, është në frymën e angazhimeve tona për transformimin e sistemit shëndetësor në vend”, ka thënë ministri Latifi si dhe ka falënderuar Qeverinë e Dukatës së Madhe të Luksemburgut për financimin e këtij projekti.
“Sot nga ky vend ju themi faleminderit taksapaguesve të Luksemburgut për mbështetjen e vazhdueshme, të cilën e vlerësojmë shumë dhe të cilën jam i bindur se do ta arsyetojmë me punë”, tha mes tjerash ministri Latifi.
Në këtë përurim, morën pjesë edhe u.d. drejtoresha e SHSKUK-së, dr. Pranvera Zejnullahu-Raçi, kryetarja e Bordit të SHSKUK-së, dr. Aida Rexhepi, anëtarja e bordit të SHSKUK-së, dr. Agreta Gecaj- Gashi dhe kryetari i komunës së Gjilanit, z. Alban Hyseni. /Gazeta Shneta/