Pezullohet zhvillimi i vaksinës anti Covid në Oksford pas sëmurjes së një vullnetari

Zhvillimi i vaksinës anti Covid në Universitetin e Oksfordit është pezulluar për shkak të sëmurjes së një vullnetari.

Një zëdhënës i kompanisë “AstraZeneca” e cila e ka mbështetur zhvillimin e vaksinës, i ka thënë ‘The Guardian’ se procesi është pezulluar për shkak se një pjesëmarrës ka shfaqur një sëmundje të pashpjegueshme deri më tani, transmeton Gazeta Shneta.

Ai ka deklaruar se ky reagim ka ndodhur vetëm tek një vullnetar dhe pezullimi është pjesë e procesit të zhvillimit të vaksinës.

“Ky është një veprim normal që duhet të ndodhë sa herë që ka një sëmundje potencialisht të pashpjegueshme gjatë provave, dhe derisa të hetohet ne duhet të sigurohemi në integritetin e procesit. Këto raste duhet të rishikohen në mënyrë të pavarur dhe të kujdesshme”, ka deklaruar ai.

Ndërkaq BBC ka raportuar se kjo është hera e dytë që zhvillimi i vaksinës ndërpritet prej kur kanë filluar provat në muajin prill.

Detajet e sëmundjes nuk janë publikuar, por mediat kanë raportuar se bëhet fjalë për një inflamacion në palcën kurrizore. /Gazeta Shneta/