Ndonëse numri i të pickuarve nga rriqrat në periudhën mars-qershor në Kosovë, ka shkuar në shifrën 338 raste, mjekët thonë se nuk ka vend për panikë.
Drejtoresha e Klinikës Infektive në Qendrën Klinike Universitare të Kosovës (QKUK), Lindita Ajazaj – Berisha, ka sqaruar për Telegrafin se shumica e të pickuarve sipas të dhënave, vijnë nga Komuna e Prishtinës, me 238 raste.
Sipas saj, Komuna e Malishevës, në këtë periudhë kohore, ka vetëm me 25 raste të pickimit të rriqrave, për të vazhduar me Fushë–Kosovën, Drenasin, Podujevën.
“Fatmirësisht nuk kemi ndonjë fluks të madh nga ky regjion, ku kjo komunë e ka menaxhuar shumë mirë këtë problematikë. Rastet që janë trajtuar, është bërë largimi i rriqrës, dhe janë paraqitur ankesa pas pickimit, ku kanë kërkuar ndihmë te ne”, ka shtuar ajo.
Doktoresha Ajazaj – Berisha ka theksuar se nuk ka vend për panikë.
“Në disa raste bëhet largimi i rriqrës nga vet ata që janë pickuar, por kjo kryhet edhe nëpër Qendrat e Mjekësisë Familjare (QMF), ose vinë te ne e ju largojmë rriqrrat, duke i informuar se si duhet të reagojnë kur pësojnë komplikime në gjendjen e tyre shëndetësore”, ka thënë ajo.
Doktoresha Ajazaj – Berisha ka sqaruar se vetëm një rast i rëndë me ethe hemoragjike është paraqitur në Klinikën Infektive në QKUK, por që sipas saj, falë angazhimit të stafit të klinikës dhe barnave, fëmija është lëshuar në shtëpi, në gjendje të mirë shëndetësore.