Shkencëtarët thonë se trupi me të vërtetë ka një prag, sa i përket tolerimit të nxehtësisë.
Dëshmitë kanë qenë kontradiktore mbi kufijtë e sipërm të zonës neutrale termike njerëzore (TNZ), që është diapazoni i temperaturave të ambientit ku trupi mund të ruajë temperaturën e tij bazë me rregullim minimal metabolik, shkruan Health News përcjell Gazeta Shneta.
Për të mbushur boshllëkun e njohurive, studiuesit në Universitetin e Roehampton kryen një eksperiment që mati shkallën metabolike të pushimit të pjesëmarrësve (RMR) në temperatura që varionin nga një dhomë normale në 50°C dhe lagështia prej 25% dhe 50%.
Shkalla metabolike e pushimit të pjesëmarrësve, i referohet numrit total të kalorive të djegura kur trupi është plotësisht në qetësi dhe përbën rreth 70% të shpenzimit total të energjisë.
Studimi tregon se një temperaturë e lartë kritike (UCT) ekziston për njerëzit dhe ka të ngjarë të jetë midis 40°C dhe 50°C.
Të kuptuarit se në çfarë temperaturash fillojnë të rriten ritmet e metabolizmit të njeriut dhe se si kjo ndryshon midis njerëzve, mund të ketë implikime për kushtet e punës, sportet, mjekësinë dhe udhëtimet ndërkombëtare.
Duke përdorur një ekokardiograf, ekipi hulumtues hetoi gjithashtu se si funksioni i zemrës ndikohet nga temperaturat e larta kritike.
Ata gjetën disa ndryshime në reagimet e funksionit të zemrës ndaj nxehtësisë midis kategorive të njerëzve, veçanërisht midis burrave dhe grave. Për shembull, gratë duket se përjetojnë një rritje më të madhe të rrahjeve të zemrës kur ekspozohen ndaj temperaturave të larta.
“Ne po ndërtojmë vazhdimisht një pamje rreth asaj se si trupi reagon ndaj stresit të nxehtësisë, sa i adaptueshëm mund të jetë ai, kufijtë e këtyre përshtatjeve dhe – më e rëndësishmja – sa të ndryshme janë reagimet midis individëve. Në një botë që ngrohet, kjo njohuri bëhet gjithnjë e më e vlefshme”, thotë profesor Leëws Halsey, autori kryesor i hulumtimit.
Viti 2022 ishte viti i 6-të më i ngrohtë në botë i regjistruar që nga viti 1880, dhe temperaturat pritet të vazhdojnë të rriten.
Ndërsa ngrohja e klimës tashmë ka rritur dehidratimin, infeksionet tropikale, alergjitë dhe sëmundshmërinë kardiovaskulare, disa shkencëtarë e quajnë atë kërcënimin më të madh për shëndetin publik global. /Gazeta Shneta/