Prindërve në Londër u është kërkuar që të vaksinojnë fëmijët e tyre kundër fruthit pas rritjes së rasteve.
Kjo thirrje vjen pasi 74 raste të fruthit u konfirmuan në Londër në periudhën e fundit mujore – numri më i larti në Angli, sipas Agjencisë së Sigurisë Shëndetësore në Mbretërinë e Bashkuar (UKHSA), raporton BBC Health përcjell Gazeta Shneta.
Gjashtë muajshe Margot House është në mesin e fëmijëve në kryeqytet që së fundmi janë prekur nga kjo sëmundje.
Ajo përfundoi në spital duke pasur nevojë për ndihmë në mbështetje të funksionit të frymëmarrjes dhe lehtësimi të procesit të ngrënies.
NHS thotë se fruthi është një sëmundje shumë ngjitëse dhe mund të shkaktojë komplikime serioze te disa njerëz. Në raste të rralla mund të jetë edhe fatale.
Dr. Elizabeth Whittaker, një konsulente në sëmundjet infektive pediatrike në Spitalin Mary në Paddington, në veri të Londrës, tha se ishte “me të vërtetë e shqetësuar” për një numër në rritje të rasteve që vijnë në departamentin e urgjencës.
“Fruthi ka një shkallë të lartë të komplikimeve tek fëmijët dhe ato komplikime kanë një shkallë të lartë të vdekshmërisë”, tha ajo.
“Në shpërthimin e fundit, ne patëm disa viktima dhe shqetësimi është se sa më shumë raste të kemi, aq më shumë ka gjasa që të kemi një tragjedi në duart tona.”
Për shkak se Margot është nën 12 muajshe, ajo nuk ishte e përshtatshme për vaksinën e fruthit, shytave dhe rubeolës (MMR).
“Ajo nuk ka fjetur, ajo kurrë nuk ka qenë me një gjumë të shkëlqyeshëm, por kjo ishte një nivel krejtësisht i ri, duke mos fjetur fare. Thjesht kaq e pakëndshme situata dhe me dhimbje,” tha nëna e vogëlushes, Georgina House.
Që nga tetori 2023, më shumë se një e katërta (29%) e të gjitha rasteve të fruthit në Angli janë gjetur në kryeqytet.
Doza e parë e vaksinës MMR u ofrohet të gjithë fëmijëve në moshën një vjeçare dhe fëmijëve u jepet një dozë e dytë përpara se të shkojnë në shkollë, zakonisht në tre vjet e katër muaj.
Dr. Andrew Steeden, mjeku i përgjithshëm i Kensington Jugor, tha se rritja e rasteve ishte për shkak të rënies së normave të vaksinave nën objektivin 95% të Organizatës Botërore të Shëndetësisë (OBSH).
“Unë mendoj se mund të jetë një tregues se sa i suksesshëm kanë qenë imunizimet në të kaluarën,” shpjegoi ai.
“Njerëzit kanë menduar se shumë nga këto sëmundje janë zhdukur dhe sigurisht në Londër, ne kemi parë rikthimin e shumë sëmundjeve infektive si pasojë e uljes së shkallës së përgjithshme të imunizimit – kështu që të gjithë duhet të jemi të kujdesshëm, vigjilentë dhe të mbrojmë të tjerët sa më shumë që të mundemi”./Gazeta Shneta/