Prindërit shqiptarë vazhdojnë të besojnë në bestytni të ndryshme kur bëhet fjalë për fëmijët. Veçanërisht ata prindër që kanë vetëm fëmijë të gjinisë femërore, bëjnë çmos që në të ardhmen t’ju vijë në jetë një foshnjë djalë.
Duke qenë me traditë patriarkale, djali simbolizon trashëgiminë që do ta përcjellë familjen, do të kujdeset për prindërit kur të rritet pasi vajza besohet se është “rob” i huaj. Kështu prindërit shqiptarë nganjëherë bëjnë edhe veprime të pakuptimta.
Së fundmi në rrjetet sociale ka qarkulluar një diskutim ndërmjet një nëne e cila kishte lindur djalë pas pesë vajzave, dhe një komentuese e cila për kureshtje e pyet nënën për emrin e vajzës së pestë, së cilës prindërit ia kishin vënë emrin Ndalesë, shkruan Gazeta Shneta.
Pasi komentuesja e pyet nënën pse ia kanë vënë këtë emër, ajo përgjigjet: Pse janë pesë motra e vetëm një vëlla, e kanë për mu ndal vajzat për me lind djalë; Komenti: Edhe pas Ndalesës është djali a?; Po djalë edhe Tarzan bile!, përgjigjet ajo.
Prindërit kanë besuar se pasi t’ia vënë emrin Ndalesa vajzës së pestë, ardhja në jetë e vajzave do të ndalet dhe do të vijojnë djemtë. Nëna ka shkruar në komente se vajza është e lumtur me këtë emër.
Vitin e kaluar në Kosovë kanë lindur 23 mijë e 402 fëmijë, prej tyre 11 mijë e 81 vajza dhe 12 mijë e 321 djem. /Gazeta Shneta/
