Prokuroria Themelore në Prishtinë ka ngritur aktakuzë kundër tre zyrtarëve të Qendrës Klinike Universitare të Kosovës, që dyshohen për mashtrim prej më shumë se 100 mijë eurove.
Leotrim Jahja, Faton Hajzeraj dhe Ylber Krasniqi akuzohen për keqpërdorim të detyrës.
Sipas aktakuzës, në dhjetor të 2020-s, në cilësinë e zyrtarëve të departamentit të teknologjisë informative (IT), kishin nënshkruar një raport fiktiv që ishte në kundërshtim me gjendjen faktike, duke i shkaktuar dëm material QKUK-së në shumë prej gati 105 mijë eurove.
Ata dyshohet se kishin nënshkruar kontratën si punë të kryer, por në fakt s’i kishin kryer instalimet e kamerave, siç ishte paraparë, në kuadër të tenderit për furnizim dhe monitorim të sistemit të integruar me kamera, me kompaninë “Artech”.
Prokurori ka kërkuar që të pandehurit të shpallen fajtor dhe pos dënimit për veprën penale t’u shqiptohet edhe dënimi plotësues për ndalim të ushtrimit të detyrave në administratën publike.
Gazeta Shneta pati raportuar për këtë skandal para disa muajsh i cili ishte zbuluar përmes një raporti të auditorit të brendshëm në SHSKUK. Leotrim Jahja ishte arrestuar nga Policia e Kosovës dhe i njëjti është përjashtuar nga puna nga Komisioni Disiplinor. Ndërkaq Hajzeraj dhe Krasniqi ishin dënuar me heqje të një pjese të pagës. /Gazeta Shneta/