Një studim i ri tregon se ndryshimet gjenetike mund të shpjegojnë pse disa persona reagojnë më mirë ndaj ilaçeve moderne për humbje peshe sesa të tjerët. Medikamente si Ozempic, Mounjaro dhe Zepbound kanë ndryshuar trajtimin e obezitetit dhe menaxhimin e peshës trupore, por efektet e tyre nuk janë të njëjta për të gjithë pacientët.
Sipas burimit Euronews Health, disa njerëz humbin më pak se 5% të peshës së tyre trupore, ndërsa të tjerë arrijnë të humbin më shumë se 20%. Sipas studiuesve, gjenetika mund të luajë rol kyç në këtë ndryshim, si në efektivitetin e trajtimit ashtu edhe në shfaqjen e efekteve anësore.
Studimi, i publikuar në revistën “Nature”, analizoi të dhënat e gati 28 mijë personave që kishin përdorur të paktën një nga ilaçet më të zakonshme të kësaj kategorie. Pjesëmarrësit kishin përdorur terapinë mesatarisht për 8.3 muaj.
Rezultatet treguan se një variant i caktuar në receptorin GLP-1 lidhej me humbje më të madhe në peshë. Personat që mbanin këtë variant humbën mesatarisht 0.76 kilogramë më shumë gjatë trajtimit krahasuar me ata që nuk e kishin.
Një variant tjetër gjenetik u lidh me më shumë të përziera dhe të vjella te përdoruesit e tirzepatidit, por nuk ndikoi në sasinë e peshës së humbur.
Megjithatë, ekspertët theksojnë se ndikimi i gjeneve është relativisht modest.
Faktorë të tjerë si gjinia, lloji i ilaçit, doza, kohëzgjatja e përdorimit, mënyra e jetesës dhe aktiviteti fizik mund të kenë ndikim edhe më të madh në rezultatet përfundimtare.
Sipas specialistëve, këto zbulime hapin rrugën për trajtime më të personalizuara në të ardhmen.
Duke kuptuar paraprakisht se kush do të përfitojë më shumë ose kush ka më shumë gjasa të përjetojë efekte anësore, mjekët mund të zgjedhin terapinë më të përshtatshme për secilin pacient dhe të rrisin suksesin e trajtimit. /Gazeta Shneta/