Gjinekologia Dr. Trina Nushi nga Spitali Lindja ka folur në një bisedë për Gazetën Shneta rreth shkaqeve, simptomave dhe mundësisë së parandalimit të abortit
Doktoresha Trina Nushi-Jahjaga thotë se aborti ndodh atëherë kur fryti është i paaftë për mbijetesë dhe duhet të largohet nga mitra e nënës. Shkaqet e kësaj gjendje sipas saj janë të shumta dhe të ndryshme. Ato mund të rrjedhin nga nëna, apo embrioni ose fryti.
“Gjendja shëndetësore e nënës: infeksionet, lajmërimi i hipertensionit , diabetit, çrregullimet metabolike apo edhe pamjaftueshmëria e hormoneve, mund të çojë deri te një abort. Format anatomike jo të përshtatshme të mitrës: si septumi në mitër, mitra dy brinjore, prezenca e polipeve në brendësi të kavitetit të mitrës apo pamjaftueshmëria e qafës së mitrës – mund të shkaktojë abortin”, shpjegon Dr. Nushi-Jahjaga.
Ndërkaq aborti mund të ndodh edhe për faktin se embrioni është jo i shëndosh gjenetikisht.
Gjinekologia tregon veset e grave që mund të sjellin deri te ndërprerja e shtatzënisë. Përveç duhanit, janë edhe alkooli si dhe substancat narkotike të cilat për fat të keq janë prezentë në mesin e të rinjve, si dhe jeta e natës e çrregullt.
“Një grua shtatzënë prej momentit që kupton që është shtatzënë, e deri në lindje duhet të jetë e kujdesshme. Vet shtatzënia është një gjendje sekondare e organizmit të femrës, ku për 9 muaj me radhë organizmi pëson ndryshime rrënjësore qoftë fizike, qoftë sensitive. Dhe pas 9 muajve përsëri kthehet në gjendjen e mëparshme. Prandaj edhe kujdesi ndaj vet shtatzënisë duhet të jetë në nivel”, rekomandon doktoresha Trina.
Simptomat e abortit spontan:
– Lajmërimi i gjakderdhjes
– Lajmërimi i dhimbjeve në formë të shtrëngimeve të fundit të barkut që mund të përcillen edhe me dhimbje të shpines ose anasjelltas
“Lajmërimi i gjakderdhjes, i dhimbjeve në trajtë të shtrëngimeve të lajmërohen sa me parë te gjinekologu”, thotë mjekja.
Ajo shpjegon se aborti mund të parandalohet nëse embrioni qëndron ende në brendësi të mitrës. Vlerësimi i një gjendje të tillë bëhet me ultrazë.
“Mjekimi varet prej shenjave të abortit. Në qoftë se kemi gjakderdhje dhe në ultrazë konstatohet prezenca e ndonjë gjakderdhje/hematomë në brendësi të mitrës. Bëhet menaxhimi i gjakderdhjes në 48 orët e para me dhënien e gestagjeneve dhe regjim shtrati”.
“Ndërsa, nëse kemi të bëjmë me dhimbje të shpinës dhe pjesës së poshtme të barkut, ku me ultrazë konstatohet prezenca e ‘hallkes së kontraksionit’ në mitër. Mjekimi vazhdon me dhënien e lëngjeve intravenoze dhe analgjetikeve si dhe regjim shtrati”.
Gjinekologia thotë se aborti në rastin e shtatzënisë së planifikuar dhe dëshiruar është shumë e dhimbshme për femrat. Në rastet e shtatzënive të para shkakton edhe frikë se një gjë e tillë mund të përsëritet edhe në shtatzënitë e ardhshme.
Mjekja në fund tregon sa duhet të pritet deri në rikuperimin e trupit për të nisur shtatzëninë tjetër. “Rikuperimi i organizmit të gruas pas abortit varet nga shkaktari abortit dhe madhësia e abortit. Në qoftë se kemi ndonjë shkaktar specifik, së pari duhet çrrënjoset apo të eliminohet shkaktari pastaj të planifikohet shtatzënia. Por, për një shtatzëni të radhës, së paku duhet të pritet 2-3 muaj”, ka treguar Dr. Trina Nushi-Jahjaga.
Për më tepër këshilla ose konsulta mund të vizitoni Spitalin Lindja në Prishtinë, kontakti: 049 999 923. /Gazeta Shneta/