Një mesazh i anesteziologut Shkëlzen Muriqi ka ngritur dyshimet për mungesë profesionalizmi në Klinikën e Kardiokirurgjisë në QKUK. Ky mesazh i Muriqit ka rrjedhur në profilin e tij në Facebook
Gjatë ditës së sotme anesteziologu Shkëlzen Muriqi ka postuar një mesazh në profilin e tij në Facebook të cilin ia kishte dërguar drejtorit të Klinikës së Kardiokirurgjisë me Kardiologji Invazive Dr. Tefik Bekteshit. Muriqi në mesazhin që mban datën 4 tetor të këtij viti, i drejtohet Bekteshit për një shqetësim të tij në lidhje me dy pacientë, shkruan Gazeta Shneta.
“Për arsye se të njëh një kohë të gjatë (22 vjet) dashta të informoj para se ta bëj publike. Në MIKK i ke 2 pacient të intubuar ka 3 ditë nga ekipa që shumë e ke favorizuar. I vetquajturi prof. Adem Grbollar, i vetquajturi kardiokirurg Rifat Brahimaj, të vetquajturat kardioanesteziologe Dafina e Doruntina, nga specializanti i favorizuar Rama dhe instrumentarja bukuroshe T.”, thuhet në mesazhin e Muriqit. Gazeta qëllimisht nuk e ka ekspozuar emrin e instrumentares për shkak të ndjeshmërisë me epitetin të cilin i drejtohet mesazhi.
Ndryshe ky mesazh ngrit dyshimet për mos profesionalizëm të ekipës së mjekëve të apostrofuar, pasi dy pacientët e trajtuar kanë qëndruar për më shumë se tre ditë në mjekimin intensiv. Kjo gjendje mund të ketë ardhur si pasojë e komplikimeve gjatë operacioneve që janë realizuar.
Disa minuta pas publikimit të këtij mesazhi, profili i Muriqit është mbyllur dhe nuk mund të gjendet më në Facebook.
Gazeta ka kontaktuar me anesteziologun Dr. Shkëlzen Muriqi, por ai ka mohuar origjinalitetin e mesazhit duke thënë se nuk është fare në dijeni. “Pasha Zotin unë nuk kam as facebook, veç nëse ka dal gabim diçka. Nuk kam facebook, e kam të mbyllur nuk e përdori. Nuk jam në dijeni për këtë mesazh”, ka deklaruar Muriqi. /Gazeta Shneta/
