Psilocibina, një substancë e njohur për efektet e saj euforike dhe halucinogjene që gjendet në lloje të ndryshme të kërpudhave të quajtura “magic mushrooms”, mund të ketë përfitime të papritura për shëndetin qelizor dhe jetëgjatësinë.
Një studim i ri i publikuar në revistën “npj Aging”, zbulon se psilocibina mund të ngadalësojë procesin e plakjes duke zgjatur jetëgjatësinë e qelizave të lëkurës dhe mushkërive njerëzore me mbi 50%, shkruan burimi Medical News Today transmeton Gazeta Shneta.
Studimi u udhëhoq nga prof. Louise Hecker nga Kolegji i Mjekësisë Baylor, dhe përveç zgjatjes së jetës së qelizave në laborator, studiuesit testuan efektet e substancës edhe te minjtë, duke përdorur një model të plakjes. Minjtë që morën psilocibinë kishin jetë më të gjatë dhe shfaqnin shenja më të pakta të plakjes, si rënie më e vogël e flokëve të bardhë dhe rigjenerim i flokëve.
Psilocibina është përqendruar tradicionalisht në kërkime për trajtimin e çrregullimeve mendore si depresioni rezistent ndaj trajtimit, çrregullimi obsesiv-kompulsiv (OCD), PTSD dhe varësitë, por ky studim sugjeron se ajo mund të ketë efekte mbrojtëse sistemike ndaj sëmundjeve të lidhura me moshën si neurodegjenerimi, sëmundjet e zemrës dhe kanceri.
Shkencëtarët theksojnë se substanca aktive në psilocibinë, psilocina, nuk ndalon plakjen, por ndihmon qelizat të plaken më ngadalë duke ruajtur karakteristikat e tyre “të reja” për më gjatë. Ky zbulim hap një fushë të re premtuese kërkimore për trajtimin e plakjes dhe sëmundjeve të lidhura me të, me qëllim rritjen e cilësisë dhe jetëgjatësisë së jetës te të moshuarit.
“Nëse një ndërhyrje e tillë mund të ndihmojë të moshuarit të jetojnë më gjatë dhe më shëndetshëm, kjo do të ishte një arritje e jashtëzakonshme,” përfundon Hecker. /Gazeta Shneta/