Mjekët dhe farmacistët në të gjithë rajonin u përpoqën me shpejtësi të mbanin ilaçet jetike në temperaturën e duhur dhe të deshifronin recetat e shkruara me dorë. Pastaj pritën.
Kur Dr. Tiago Villanueva mbërriti në klinikën e mjekësisë familjare në Lisbonë të hënën pasdite, ajo dukej si një qytet fantazmë. Pacientët ishin dërguar të gjithë në shtëpi dhe punonjësit shëndetësorë po përgatiteshin për një krizë me kohëzgjatje të panjohur – pothuajse si pandemia e COVID-19.
Por këtë herë, nuk kishte shërbim telefoni, as internet, dhe as energji elektrike.
Ende nuk është e qartë se çfarë e shkaktoi ndërprerjen e madhe, që zgjati për disa orë në Spanjë dhe Portugali, por ndikimi u ndie menjëherë në të gjithë Gadishullin Iberik, i cili ka një popullsi të kombinuar prej rreth 60 milionë banorësh.
Bizneset u mbyllën, njerëzit mbetën në tunelet e metrosë.
Për punonjësit shëndetësorë, ndërprerja e energjisë do të thoshte ndërprerje të shërbimeve të zakonshme, ndërsa ata i dhanë përparësi kujdesit mjekësor urgjent.
Spitalet u mbështetën në gjeneratorë për të mbajtur hapur repartet e urgjencës dhe vazhduan vetëm me ndërhyrjet kirurgjikale më urgjente. Trajtimet e pacientëve me dializë u vonuan, duke rezultuar në seanca më të shkurtra në disa raste.
Kur ndërprerja nisi rreth mesditës, ekipi i Villanueva-s “u përpoq akoma për disa vizita t’i bënte manualisht, duke shkruar recetat me dorë – si 30 vjet më parë,” i tha mjeku, Euronews Health, transmeton Gazeta Shneta.
Në fund, ata i dërguan pacientët në shtëpi dhe pritën udhëzime nga autoritetet shëndetësore qendrore, ose që pacientët e sëmurë të paraqiteshin vetë. Ata e lanë klinikën vetëm kur dielli nisi të perëndojë, duke e bërë pamjen një problem, tha Villanueva, i cili është edhe president i Unionit Evropian të Mjekëve të Përgjithshëm/Mjekëve Familjarë (UEMO).
Shqetësimet për ruajtjen e vaksinave në temperaturë të ftohtë
Në të dy vendet, një nga shqetësimet më të mëdha për punonjësit shëndetësorë ishte rreziku për vaksinat, të cilat duhet të ruhen në temperatura të ftohta. Çdo rënie e temperaturës mund t’i bëjë ato kryesisht joefektive.
Klinika e Villanueva-s arriti të transportojë dozat e saj – si vaksina kundër fruthit, shytave dhe rubeolës dhe një vaksinë që mbron fëmijët e vegjël kundër tuberkulozit (TB) – në një spital aty pranë, por ende nuk është e qartë nëse të gjitha qendrat e kujdesit parësor në Portugali arritën të bëjnë të njëjtën gjë.
Ndërkohë, në Terrassa, një qytet pranë Barcelonës, farmacisti Jordi Nicolás tha për Euronews Health se farmacitë spitalore po ashtu arritën të përdornin gjeneratorët e spitaleve, duke siguruar që barnat dhe vaksinat të mbeteshin të ruajtura në mënyrë të përshtatshme.
Por kishte edhe një pengesë tjetër: shumë farmaci në Spanjë janë të automatizuara, që do të thotë se ekipi i Nicolás-it duhej të gjente zgjidhje alternative për të siguruar që barnat kritike, si ato që përdoren në kujdesin intensiv, të ishin ende të aksesueshme edhe pa energji.
“Në shumicën e spitaleve në Spanjë, energjia elektrike u rikthye rreth orës 9 ose 10 të mbrëmjes, kështu që duket si një përfundim i lumtur,” tha Nicolás. /Gazeta Shneta/