Një studim i ri me përmasa botërore tregon se të rinjtë sot nuk janë më aq të lumtur sa gjeneratat e mëparshme.
Të dhënat janë mbledhur nga më shumë se 200 mijë persona në mbi 20 vende të ndryshme gjatë vitit 2023, dhe analizohen në kuadër të Studimit Global të Mirëqenies, një bashkëpunim mes Universitetit të Harvardit dhe Baylor University, publikuar në revistën Nature Mental Health.
Tradicionalisht, studimet kanë treguar se lumturia ndjek një formë harkore në jetë: njerëzit janë më të lumtur në rini, përjetojnë një rënie në mes të jetës, dhe më pas ndihen më mirë teksa plaken. Por sot, kjo duket se ka ndrzshuar. Të rinjtë – veçanërisht ata nga 18 deri në 29 vjeç – raportojnë nivele më të ulëta të mirëqenies sesa më parë.
Çfarë nuk shkon me të rinjtë sot?
Sipas studimit, të rinjtë nuk përballen vetëm me mungesën e lumturisë, por edhe me sfida në shëndetin fizik dhe mendor, vlerësimin e vetes, kuptimin e jetës, marrëdhëniet ndërpersonale dhe sigurinë financiare.
Në shumicën e vendeve perëndimore, sidomos në SHBA, kontrasti mes mirëqenies së të rinjve dhe atyre mbi 50 vjeç është më i theksuar. Në disa vende të tjera, si Polonia dhe Tanzania, mirëqenia bie me moshën, ndërsa në vende si Japonia dhe Kenia, forma tradicionale e harkut ende qëndron.
Ekspertët shprehen të shqetësuar
Profesor Tyler VanderWeele nga Harvard, autor kryesor i studimit, thotë se gjetjet ngrejnë një pyetje të rëndësishme: “A po investojmë sa duhet në mirëqenien e të rinjve?” Ndërkohë, profesoresha e psikologjisë në Yale, Laurie Santos, vëren se shoqërimi dhe lidhjet sociale, që janë thelbësore për lumturinë, janë në rënie mes të rinjve.
Një tjetër faktor i përmendur është përdorimi i lartë i teknologjisë dhe koha e kaluar përpara ekranit, që zëvendëson aktivitetet sociale.