Qeveria e Italisë do ta përkrah shëndetësinë kosovare me një projekt prej 3 milion euro, ndërsa sot është dorëzuar donacioni i parë me aparatura në vlerë 370 mijë euro
Agjencia Italiane për Bashkëpunim dhe Zhvillim ka dorëzuar sot një donacion me aparatura në vlerë 370 mijë euro për Klinikën e Kardiokirurgjisë me Kardiologji Invazive në QKUK. Këto aparatura të cilat do të vendosen në sallën e re operative dhe kujdesit intensiv të kësaj klinike, janë në kuadër të një projekti 3 milionësh të Qeverisë italiane për shëndetësinë kosovare, shkruan Gazeta Shneta.
Ministri i Shëndetësisë, Uran Ismaili, ka deklaruar se ky donacion do të ndikojë që në Kardiokirurgji të kryhen më shumë shërbime për pacientët. “Do të jenë pacientë më shumë që marrin shërbime, pra kemi zhvilluar kapacitete të reja dhe këto kapacitete janë mundësi nëpërmjet pajisjeve të dhuruara nga shteti i Italisë, por gjithnjë me punën e punëtorëve tanë shëndetësorë”, ka thënë ai.
Ismaili ka shtuar se projekti do të vazhdojë edhe dy vjet, ku do të ketë ngritje të kapaciteteve së bashku mjekët nga Italia, ku do të funksionalizohen edhe salla të reja si dhe do të bëhet trajnimi i mjekëve dhe infermierëve.
Ambasadori i Italisë në Prishtinë, Piero Cristoforo Sardi, theksoi se kjo është faza e parë e donacionit për aparatura mjekësore në Kardiokirurgji në Spitalin e Prishtinës. Sipas tij, ky bashkëpunim të vazhdojë edhe më tej me Ministrinë e Shëndetësisë.
”Jemi këtu për të parë nga afër realizimin e një pjese të projektit, që është bërë i mundur nga qeveria italiane. Projekti është rreth 3 milionë euro si donacion me disa pajisje mjekësore në Spitalin e Kardiokirurgjisë në Prishtinë, ku gjithashtu dje nënshkruam kontratën për mbështetjen e projektit në Repartin e Kardiokirurgjisë”, shtoi Cristoforo Sardi. /Gazeta Shneta/