Qeveria ka emëruar anëtarët e rinj të Bordit për Fondin e Sigurimeve Shëndetësore.
Bordi ri përbëhet nga Armend Zemaj, Ministria e Shëndetësisë; Hykmete Bajrami, Ministria e Financave; Skender Reçica, Ministria e Punës dhe Mirëqenies Sociale; Rrezart Halili, Kryetari ose Përfaqësuesi i Odës së profesionistëve shëndetësorë; Murat Berisha, Kryetari i Bordit ose përfaqësuesi i Shërbimit Spitalor dhe Klinik Universitar të Kosovës; Bujar Gashi, Asociacioni i Komunave të Kosovës; Muhamedali Kodra, përfaqësues i shoqatave të pacientëve, shkruan Gazeta Shneta.
Tre prej këtyre anëtarëve, Rrezart Halili, Murat Berisha dhe Muhamedali Kodra kanë qenë anëtarë edhe në përbërjen e kaluar të emëruar nga ish-Qeveria Haradinaj në kohën kur ministër i Shëndetësisë ka qenë Uran Ismaili nga PDK.
Ministri Zemaj është zotuar se do të angazhohet maksimalisht që sigurimet shëndetësore të realizohen në mandatin e tij.
“Jemi të përkushtuar maksimalisht dhe po angazhohem që sa më parë të plotësohen të gjitha parakushtet, në mënyrë që Fondi i Sigurimeve Shëndetësore të jetë në funksion të plotë dhe t’u ofrohet qytetarëve sigurime shëndetësore dhe mburojë financiare. Po ashtu grupi punues ka filluar punën për hartimin e ligjit për sigurimet shëndetësore. Do të insistoj që të punohet pa humbur kohë dhe me një dinamikë të shpejt për draftimin e tij”.
“Fondi i Sigurimeve Shëndetësore është institucion i pavarur publik me përgjegjësi dhe autorizime të veçanta që, në emër të të siguruarve, të administrojë me mjetet financiare për ofrimin e shërbimeve të kujdesit shëndetësor nga institucionet shëndetësore në të gjitha format e pronësisë”, ka shkruar Zemaj në postimin e tij.
Ndryshe Fondi i Sigurimeve Shëndetësore udhëhiqet nga Fatmir Plakiqi. /Gazeta Shneta/