Stafi mjekësor i Klinikës së Ortopedisë me Traumatologji në Qendrën Klinike Universitare të Kosovës (QKUK), ka kryer një intervenim të rrallë, duke vendosur protezë totale në kërdhokullën e pacientes Q.B, 49-vjeçare, e cila kishte çrregullim zhvillimor të kërdhokullës që nga lindja.
Lajmin e ka bërë të ditur faqja zyrtare e QKUK-së në Facebook, e cila njëherësh ka njoftuar se pacientja ishte paraqitur fillimisht në këtë klinikë për probleme në ecje dhe dhimbje në kërdhokullën e djathtë, shkruan Gazeta Shneta.
“Pacientja Q.B, 49 vjeçare me luksacion kongjenital të kërdhokullës së djathtë (çrregullim zhvillimor i kërdhokullës së djathtë që nga lindja), e patrajtuar që nga lindja. Ajo në Klinikën e Ortopedisë është lajmëruar për shkak të problemeve në ecje dhe dhimbje në kërdhokullën e djathtë, pasi kishte lindur me këtë problem dhe nuk është trajtuar asnjëherë për këtë problematikë.”, thuhet në njoftimin e QKUK-së.
Ndërkohë që pjesëmarrësit në operacion, siç thuhet nga njoftimi, kanë marrë pjesë paraprakisht në një përgatitje para operacionit, si dhe janë konsultuar me anesteziolog në datën 16.05.2018.
“Pas përgatitjeve preoperatore dhe konsultimin me Anesteziolog me datën, 16.05.2018 me anestezion spinal (Dr. Agron Balaj dhe Dr.Islam Krasniqi) dhe ekipi nga ana e Ortopedëve me në krye Dr. Arber Tolaj, Dr.Cen Bytyqi, Dr. Rinor Velekinca dhe Dr. Artan Bejta si dhe në instrumentare Fatmire G, kryen intervenimin kirurgjik, ku fillimisht bëhet osteotomia (prerja e kockës) e pjesës se sipërme të femurit, në nivel të trohanterit të vogël, bëhet lirimi i strukturave të buta përreth femurit proksimal, krijimi i acetabulumit primar, dhe behet implantimi i endoprotezes (vendosja e protezës ) totale në kërdhokullën e djathte me cement.”, vë në pah më tutje njoftimi.
QKUK njofton se gjendja e pacientes është stabile, derisa gjendet e shtrirë në spital, në pritje për t’iu nënshtruar terapisë fizikale.
Kërdhokullat janë secilat nga dy eshtrat anësore të legenit./Gazeta Shneta/
