QKUK-ja s’ka bateri për zemër, pacientët detyrohen t’i blejnë mijëra euro

2017-05-05 në ora 08:13

Në Klinikën e Kardiologjisë në QKUK, nuk ka bateri për zemër (pacemaker) dhe pacientët po detyrohen të shpenzojnë mijëra euro për të blerë një të tillë.

Mungesën e kësaj pajisje jetike për pacientët, e ka konfirmuar edhe Zyra e drejtorit të përgjithshëm të SHSKUK-së, raporton Gazeta Shneta.

“Në Klinikën e Kardiologjisë aktualisht nuk ka pejsmejker dhe nga UD. Drejtori i Klinikës së Kardiologjisë është bërë kërkesa për furnizim dhe do zhvillohen procedura ligjore per tender derisa buxheti për barna dhe material shpenzues nga lista jo esenciale është jashtëzakonisht  i kufizuar”, thuhet në përgjigjen e kësaj zyre.

Krejt kjo situatë ka ardhur si pasojë e skadimit të afatit të këtij materiali para pak kohësh, pasi ish-drejtori Gani Bajraktari kishte porositur më shumë sesa kishte nevojë.

Bajraktari tani po hetohet nga Prokuroria për dëmtim buxheti miliona euro, ndërsa Ministria e Shëndetësisë nuk përgjigjet nëse Kardiologjia do të furnizohet me këtë pajisje.

Një bateri për zemër në Kosovë kushton deri në 1250 euro. /Gazeta Shneta/