Qendra Klinike Universitare e Kosovës ka njoftuar se është larguar nga puna punëtorja e lavatores me iniciale F.C. pasi u arrestua nga Policia për shkak se u kap duke marr ryshfet.
“Pas raportimit për arrestimin e punëtores së lavatores në Institutin e Psikiatrisë Forenzike, F.C, menaxhmenti i Shërbimit Spitalor dhe Klinik Universitar, bazuar në Ligjin e Punës, ka larguar përkohësisht atë nga puna. SHSKUK, mbështet veprimin e Departamentit të Hetuesisë duke dënuar veprimin e bërë dhe siguruar qytetarët se nuk do të ketë vend për punëtorët që keqpërdorin detyrën zyrtare”, thuhet në njoftimin e QKUK-së, transmeton Gazeta Shneta.
Policia ka arrestuar një punonjëse të QKUK-së, pasi ka kërkuar 400 euro ryshfet nga një person për t’i rregulluar dokumentacionin për pension si viktimë e luftës.
“Me datë 19.03.2019, Drejtoria për Hetimin e Krimeve Ekonomike dhe Korrupsionit (DHKEK), konkretisht Njësia për Hetimin e Krimeve Ekonomike dhe Korrupsionit në Prishtinë, ka pranuar informacionin se e dyshuara femër (me inicialet F.C.) punëtore në Shërbimin Spitalor Klinik Universitar të Kosovës, ka kërkuar para (të holla) në vlerë prej 400 euro nga viktima me qëllim që t’i rregulloj disa dokumente mjekësore, për përfitim të një pensioni si viktimë civile e luftës”, njofton Policia.
E dyshuara është vëzhguar fshehtas nga policia, ndërsa është arrestuar menjëherë pasi ka marrë ryshfetin.
“Me datë 02.04.2019, pasi e dyshuara (F.C.) është takuar me viktimën e rastit dhe nga ajo ka marrë shumën e parave në vlerë prej 400 euro për t’i rregulluar dokumentacionin e lartcekur, menjëherë pas marrjes së parave e dyshuara është arrestuar në flagrancë nga Policia e Kosovës”, thuhet në komunikatën e Policisë.
Me vendim nga ana e Prokurorisë Themelore në Prishtinë, e dyshuara e arrestuar dërgohet në qendrën e mbajtjes për 48 orë, për procedura të mëtejme ligjore. /Gazeta Shneta/