Pacientët e sëmurë me kancer në QKUK kanë mbetur pa barna për imunoterapi pasi zyrtarët përgjegjës në Barnatoren Qendrore nuk i kanë bërë me kohë kërkesat dhe porositë për furnizim.
Klinika e Onkologjisë në Qendrën Klinike Universitare përveç tjerash, pacientët e sëmurë me disa lloje të kancerit i trajton me imunoterapi. Kjo është një nga metodat e fundit që përdoret në botë për ta fuqizuar imunitetin për luftimin e qelizave kancerogjene, shkruan Gazeta Shneta.
Në Onkologji trajtohen dhjetëra pacientë me këtë terapi, për aplikimin e së cilës përdoren dy lloje të produkteve Nivolumab dhe Pembrolizumab. Të dy këto produkte janë në mungesë në Klinikë. Këtë e ka konfirmuar edhe vet drejtori Arben Bislimi në një raportim të Gazetës disa orë më herët për mungesën e këtyre ilaçeve.
Këto dy produkte mungojnë që gati dy muaj në Onkologji dhe Gazeta Shneta sot ka mësuar se arsye për mos furnizimin me këto dy ilaçe është mungesa e kërkesave dhe porosive nga zyrtarët e Barnatores Qendrore të QKUK-së, për operatorët ekonomik.
Janë dy operatorë ekonomik të cilët e furnizojnë QKUK-në me këto dy produkte. Gazeta ka biseduar me përfaqësues të të dy kompanive. Ata kanë konfirmuar se nuk kanë pasur kërkesa për furnizim së paku që dy muaj dhe se ende nuk është përmbushur kërkesa për furnizim në tremujorin e katërt.
Gazeta ka kërkuar sqarime nga drejtoria e SHSKUK-së lidhur me këtë çështje dhe nëse do të merren masa për zyrtarët që nuk i kanë kryer kërkesat dhe porositë me kohë, por deri më tani nuk kanë kthyer asnjë përgjigje.
Gazeta sot ka publikuar një artikull ku një pacient ankohej se i është detyruar që të blinte produktin Pembrolizumab në Turqi. Ai ka thënë se dy terapi ia kishte siguruar vëllai i tij të cilat i kishin kushtuar 5600 Euro. E.H. nga Prishtina ka thënë se do të detyrohet ta ndërpresë trajtimin ose të marr para borxh për ta siguruar nga tregu privat. /Gazeta Shneta/
S’ka imunoterapi në Onkologji, pacienti: Duhet me ndërpre ose me hy borxh për me ble