Një qytetare me inicialet V. B. ka ndarë një eksperiencë pozitive në Qendrën Klinike Universitare të Kosovës (QKUK), duke shprehur mirënjohje të thellë për stafin mjekësor të Klinikës së Kirurgjisë Abdominale dhe klinikave të tjera mbështetëse.
Sipas saj, ndërhyrja kirurgjike që iu realizua para disa ditësh në QKUK ishte tejet e suksesshme, falë përkushtimit dhe profesionalizmit të mjekëve dhe stafit shëndetësor. Ajo ka veçuar me falënderime të veçanta Dr. Valon Zejnullahun, operatorin kryesor, si dhe ekipin mbështetës: Dr. Dafina Mahmutaj, Dr. Turkane Karabegu Shehu, Dr. Enver Fekaj dhe shumë të tjerë të pranishëm në sallën operative, shkruan Gazeta Shneta.
Gjithashtu, ajo ka shprehur mirënjohje për mjekët nga klinikat e tjera që ishin pranë saj gjatë gjithë procesit, duke përmendur Dr. Agreta Gecaj Gashin, Dr. Nazmi Kolgecin, Dr. Gentian Lilën, Dr. Jetmir Kastratin dhe Dr. Rame Alajn, duke kërkuar falje nëse ka harruar ndonjë emër.
Një falënderim i veçantë i është dedikuar stafit të mesëm të Klinikës, të cilët, sipas qytetares, janë kujdesur për të deri në detaje.
Në mesazhin e saj, V. B. thekson fatin që Kosova, përkundër sfidave infrastrukturore, ka një mjekësi profesionale dhe të përkushtuar, duke i quajtur punonjësit shëndetësorë “jetë-shpëtues”.
Kjo dëshmi pozitive është një vlerësim për punën dhe angazhimin e vazhdueshëm të stafit shëndetësor të QKUK-së në shërbim të pacientëve./Gazeta Shneta/