Qendra për Informim dhe Përmirësim Social – QIPS dhe Qendra për Raste Gjyqësore Strategjike – CSL kanë dërguar ankesë në Agjencinë për Informim dhe Privatësi, përmes së cilës kanë kërkuar që të largohen nga portalet lajmet të tilla të cilat kanë përmbajtje të dhënat personale të personave të cilët kryejnë vetëvrasje.
“QIPS ka shprehur shqetësimin për mënyrën e raportimit nga ana e portaleve në rastet e vetëvrasjes apo tentim vetëvrasjes duke publikuar të dhëna personale në kundërshtim me Ligjin për mbrojtjen e të dhënave personale e po ashtu edhe në kundërshtim me Kodin e Mediave të Shkruara”, thuhet në njoftimin e publikuar nga Qendra për Raste Gjyqësore Strategjike – CSL.
Në njoftim po ashtu thuhet se nga muaji qershor dhe deri në shtator, portali – emri i të cilit nuk është bërë publik, ka publikuar 11 raste të vetëvrasjeve përmes së cilit është bërë publike edhe fotografia e personit, të dhënat personale vendbanimi i personit, lokacioni ku është kryer vetëvrasja “ndonjëherë edhe lidhja familjare me ndonjë fytyrë publike, si dhe pjesë nga letra e lamtumirës, mosha e personit dhe mënyra se si është kryer vetëvrasja”.
Sipas CSL publikimet e tilla janë në kundërshtim me Ligjin për mbrojtjen e të dhënave personale
“Në psikologji kjo njihet si efekti “Werther” apo “Copycat Suicide” ku persona të cilët glorifikohen apo polemizohen, nëpërmjet raportimeve të mediave shpiejnë drejt një rritjeje të dukshme të vetëvrasjeve duke përdorë mënyrat e njëjta të vdekjes”, thuhet gjithashtu në reagim ndërsa theksohet se identiteti i personit i cili ka kryer vetëvrasje nuk është në interes të publikut.
“Mediat duhet të kenë kujdes të shtuar në raportimin e këtyre ngjarjeve dhe të veprojnë në përputhje me legjislacionin në fuqi dhe me kodin gazetaresk. CSL dhe QIPS kërkon që të merren masa ndaj portalit duke krijuar precedent, në mënyrë që portalet të veprojnë në përputhje me Ligjin për mbrojtjen e të dhënave personale, duke mbrojtur të drejtën e privatësisë dhe të mbrojtjes së të dhënave personale të qytetarëve të Republikës së Kosovës”, theksohet tutje.
Në kuadër të QIPS funksionon linja telefonike “Linja e Jetës” përmes së cilët personat të cilët kanë nevojë për konsulta psikologjike mund të thërrasin falas në numrat 0800 12345. /Gazeta Shneta/