Kolektivi për Mendim dhe Veprim Feminist ka raportuar se psikiatri i fëmijëve, Behar Kamberi, i cili më herët ishte dërguar në paraburgim në Tiranë pas akuzave për ngacmim dhe përndjekje ndaj moderatores Albana Bejko, është rikthyer në punë në QKUK, ku më parë ushtronte detyrën e psikiatrit të fëmijëve.
Në reagimin e publikuar në rrjetet sociale, kolektivi ka thënë se rikthimi i Kamberit është bërë ndërkohë që ai, sipas tyre, ende është nën hetime, përcjell Gazeta Shneta.
Në reagim thuhet se një veprim i tillë, përbën rrezik për vajzat dhe gratë në institucion, ndërsa u bëhet thirrje autoriteteve përkatëse që të sigurojnë mjedis të sigurt dhe të ndërmarrin masa për mbrojtjen e punëtoreve.
Deri më tani ShSKUK, nuk ka dhënë ndonjë reagim zyrtar lidhur me pretendimet për rikthimin e psikiatrit.
Postimi i plotë:
Psikiatri i fëmijëve, Behar Kamberi, i cili ishte dërguar në paraburgim në Tiranë për ngacmim dhe përndjekje të një gazetareje, është rikthyer në punë nga ShSKUK. Ky rikthim është bërë teksa ai ende është nën hetime. I njëjti, sipas kallëzimeve të vajzave e grave të ndryshme, ka përndjekur e ngacmuar seksualisht edhe vajza e gra të tjera si në punë, ashtu edhe jashtë saj. Megjithatë, ky recedivist mbetet i lirë dhe, për rrjedhojë, rrezik për vajzat e gratë përreth tij.
Sonte, ne ishim në ShSKUK për t’ua bërë me dije që ky rikthim nuk do të kalojë heshtazi dhe pa revoltë. Rikthimi i Behar Kamberit në Klinikën e Psikiatrisë paraqet rrezik publik. Ky rrezikim i mëtejshëm, i lejuar prej ShSKUK-së, përveç që na alarmon, na fton në kundëvënie. Nga këtu themi se, përderisa institucionet mbajnë brenda ngacmues dhe përndjekës, ato shndërrohen në bashkëkriminele dhe gjelatët tanë. Andaj, bëjmë thirrje që të organizohemi dhe të kërkojmë siguri për vajzat dhe gratë dhe luftim të praktikave dhe institucioneve që normalizojnë dhunën ndaj vajzave e grave.
