Rumania po përjeton shpërthimin më të madh të fruthit, por të gjitha vendet kanë raportuar raste.
Rastet e fruthit në Evropë janë rritur më shumë se dhjetëfish gjatë vitit të kaluar, me autoritetet shëndetësore që u bëjnë thirrje njerëzve që të sigurohen se janë të vaksinuar kundër sëmundjes shumë ngjitëse.
Nga fillimi i vitit 2024 deri në fillim të vitit 2025, më shumë se 32,000 raste të fruthit u raportuan në Bashkimin Evropian, Islandë, Lihtenshtajn dhe Norvegji – një rritje “e konsiderueshme” nga viti 2023, kur u raportuan më pak se 2,400 raste, sipas Qendrës Evropiane për Parandalimin dhe Kontrollin e Sëmundjeve (ECD).
Agjencia paralajmëroi se rastet ka të ngjarë të vazhdojnë të rriten në muajt e ardhshëm, sepse në vitin 2024, fruthi arriti kulmin në gjysmën e parë të vitit, raporton Euronews.
“Kjo tregon se virusi po qarkullon në rajon dhe numri i rasteve ndoshta do të rritet gjatë pranverës së vitit 2025”, tha ECDC.
Shumica e rasteve të fruthit në vitin e kaluar janë shfaqur në Rumani (27.568), e ndjekur nga Italia (1.097), Gjermania (637), Belgjika (551) dhe Austri (542). Por të gjitha vendet në Zonën Ekonomike Evropiane (ZEE) – BE, Islanda, Lihtenshtajni dhe Norvegjia – kanë raportuar raste.
Tetëmbëdhjetë persona në Rumani dhe një person në Irlandë vdiqën si pasojë e fruthit.
Shumica dërrmuese e njerëzve të infektuar – 86 përqind – ishin të pavaksinuar, sipas ECDC. Shumë ishin fëmijë të vegjël nën 4 vjeç.
“Transmetimi i vazhdueshëm tregon boshllëqe në mbulimin e vaksinimit kundër kësaj sëmundjeje të parandalueshme – midis fëmijëve, adoleshentëve dhe të rriturve njësoj”, tha agjencia.
Fruthi është aq ngjitës sa që një person i pavaksinuar mund të sëmuret nëse hyn në një dhomë ku një person i infektuar kollitej ose teshti deri në dy orë më parë, edhe nëse ai ishte larguar që atëherë.
Parandalimi i fruthit
Autoritetet shëndetësore thonë se të paktën 95 për qind e një komuniteti duhet të imunizohet me dy injeksione për të parandaluar shpërthimet e fruthit dhe për të mbrojtur njerëzit vulnerabël që nuk mund të vaksinohen, si foshnjat.
Por në vitin 2023, vetëm katër vende e arritën atë prag: Hungaria, Malta, Portugalia dhe Sllovakia.
Fruthi shkakton skuqje, ethe dhe kollë. Në raste të rënda, mund të çojë në pneumoni, encefalit dhe vdekje.
Rastet e fruthit janë rritur në mbarë botën. ECDC rekomandoi që njerëzit të kontrollojnë statusin e tyre të vaksinimit, veçanërisht nëse planifikojnë të udhëtojnë jashtë vendit.
“Një vaksinë e sigurt dhe efektive është përdorur për dekada për të parandaluar fruthin”, tha agjencia.
“Nëse nuk jeni të sigurt për historinë tuaj të vaksinimit ose nëse keni nevojë për udhëzime për vaksinimin e fëmijëve, konsultohuni me një profesionist të kujdesit shëndetësor”, shtoi agjencia./Gazeta Shneta/