Refuzimi i një recepsionistje për të lënë një takim me një doktor ka bërë që gjendja e një 2-vjeçari të prekur me sëmundjen e variçelës (lija e dhenve), të përkeqësohet jashtëzakonisht shumë.
2-vjeçari me emrin Jasper Allen, nga Cambridegshire, Angli, u shtrua në spital me rastin më të keq të sëmundjes së variçelës të parë ndonjëherë.
Ai kaloi 5 ditë në spital me trupin e tij të mbuluar me shenja të kuqe dhe plagë të cilat i shkaktonin kruarje. Më vonë plagët e tij morën infeksion të rëndë.
Nëna e vogëlushit, 36-vjeçarja Sarah tha se mjekët e konsideruan si një rast ekstrem dhe tepër të rëndë, të cilin u munduan ta kuronin me ilaçe antivirale, antibiotikë dhe morfinë në mënyrë që trupi i tij të luftonte sëmundjen.
Dy ditë para se djali i saj të shtrohej në spital, Sarah tha se kishte kërkuar për të bërë një vizitë me mjekun, vizitë të cilën recepsionistja e spitalit të zonës e anuloi duke i thënë se gjendja e djalit nuk dukej e keqe dhe se nuk ishte e nevojshme që të linin një takim me doktorin.
Pas këtij rasti nëna e vogëlushit i ka bërë apel qeverisë që të realizojë një vaksinim falas për të gjithë kundër sëmundjes./tvklan.al