Ish-futbollisti Jean Pierre Adams vdiq dje pasi ishte në koma për 39 vjet, pas një gabimi të anesteziologut në spitalin e Lyonit në vitin 1982.
Adams ishte pranuar në spital në mars të vitit 1982 për një operacion në gju. Atë kohë 34-vjeçar, Adams ishte duke përjetuar suksese në karrierën e tij si futbollist në Francë duke luajtur në Paris Saint Germain, shkruan Mirror, transmeton Gazeta Shneta.
I ndjeri kishte pësuar një lëndim në gju gjatë stërvitjeve, por një gabim i një anesteziologu dhe specializanti gjatë operacionit, bëri që ai të binte në koma për më shumë se gjysmën e jetës së tij.
Ditën kur Adams u fut në operacion, i cili nuk ishte urgjent, shumica e stafit mjekësor në Lyon ishin në grevë urie. Anesteziologu i cili do të merrte pjesë në operacion, kishte nën monitorim edhe tetë raste të tjera në të njëjtën kohë. Ai dhe një specializant do të bënin gabimin katastrofal gjatë intubimit.
Sipas Mirror, pacienti ishte intubuar gabimisht dhe kishte pësuar arrest kardiak dhe dëmtime në tru për shkak të mungesës së oksigjenit.
Specializanti e kishte pranuar gabimin menjëherë duke thënë se “unë nuk kam qenë profesionalisht i përgatitur për detyrën që më është dhënë”.
Për këtë rast janë dashur më shumë se 10 vite që gjykata të marr vendim për t’i dënuar dy mjekët me nga 750 euro gjobë si dhe një muaj suspendim.
Pas operacionit bashkëshortja e tij kishte insistuar që të përkujdeset për Adams në shtëpinë e tij. Ai vdiq dje në moshën 73-vjeçare. /Gazeta Shneta/