Ndarja e mirënjohjeve nga OMK gjatë ditës së djeshme ka shkaktuar pakënaqësi tek disa klinika, por kryetari Pleurat Sejdiu ka thënë se mirënjohjet do të vazhdojnë javën tjetër
Oda e Mjekëve të Kosovës gjatë ditës së djeshme ka shpërndarë disa mirënjohje për profesionistë të pensionuar gjatë pandemisë, si dhe për disa klinika të cilat kanë punuar me Covid.
Por me këtë rast OMK nuk ka ndarë mirënjohje për të gjitha klinikat e QKUK-së, çka ka shkaktuar edhe reagime nga menaxherët e tyre, shkruan Gazeta Shneta.
Drejtori i Klinikës së Gjinekologjisë në QKUK Dr. Jakup Ismajli, i ka reaguar përmes një komenti Pashk Buzhalës, i cili është anëtar i Këshillit Drejtues të OMK-së dhe zyrtar i MSH-së.
“Shumë urime juve zyrtarëve të ministrisë për angazhimin. A thu vallë punëtorët e klinikës së KOGJ paskan jetuar gjatë kësaj periudhe në univers. Megjithatë faleminderit që na keni harruar”, ka shkruar Ismajli.
Një reagim ka ardhur edhe nga drejtori i Klinikës së Psikiatrisë Dr. Shaban Mecinaj. Ai ka publikuar “Me shkas” një shkrim në facebook ku ka treguar për punën e klinikës gjatë pandemisë, ku si pasojë janë infektuar me Covid 38 punëtorë të klinikës.
“Cila është situata e shëndetit mendor e popullatës sot dhe cila do të jetë pas pandemisë, nuk është veshtirë të parashikohet. Sidoqoftë ne jemi këtu dhe në shërbim të pacientëve! ‘të jesh falënderues dhe i falënderuar, mirënjohja më e madhe’”, ka shkruar Mecinaj.
Por këtë situatë e ka sqaruar kryetari i Odës së Mjekëve të Kosovës Dr. Pleurat Sejdiu. Ai ka thënë se për shkak të pandemisë dhe evitimit të grumbullimit të më shumë njerëzve, ndarja e mirënjohjeve do të vazhdojë të martën e javës tjetër.
“Për shkak të numrit të kufizuar nuk kemi pas hapësirë gjatë ditës së sotme. Por ndarja e mirënjohjeve do të vazhdojë të martën për klinikat tjera mbështetëse”, ka deklaruar Sejdiu. /Gazeta Shneta/