Aulona Memeti, e cila një ditë më parë publikoi fotografi nga Klinika e Pediatrisë në QKUK dhe ngriti shqetësime për kushtet atje, ka deklaruar se pas reagimit të saj publik ka filluar të përballet me presion.
Në një postim në rrjetet sociale, ajo ka bërë të ditur se mbrëmjen e kaluar, rreth orës 23:30, është vizituar në dhomën ku po qëndron me djalin e saj dhe i është kërkuar të verifikojë pretendimet e bëra në reagimin e publikuar.
Sipas Memetit, edhe sot, rreth orës 10:30, është vizituar sërish. Ajo thotë se gjatë kësaj vizite i është thënë se pretendimet e saj nuk janë të sakta dhe i është kërkuar të hartojë një raport lidhur me rastin.
“Dua të sqaroj se nuk kam refuzuar dhe nuk refuzoj ta adresoj ankesën time përmes rrugëve institucionale. Trajtimi i djalit tim ende nuk ka përfunduar dhe, në këtë moment, prioriteti im është të kujdesem për të”, ka shkruar ajo”, ka shkruar ajo.
Memeti ka theksuar se fotografitë e publikuara, sipas saj, flasin vetë për gjendjen në të cilën ndodhen disa hapësira të Klinikës së Pediatrisë.
“Ato e dëshmojnë gjendjen ndoshta më mirë se çfarëdo ankese që mund të shkruaj unë. Për të filluar adresimin e një dysheku të njollosur, mungesës së sapunit apo kushteve elementare, nuk duhet pritur ankesa e një nëne me fëmijën e shtrirë në spital”, ka deklaruar ajo.
Reagimi i saj pason publikimin e fotografive nga Pediatria e QKUK-së, përmes të cilave ngriti shqetësime për kushtet në këtë klinikë.
Në fund, Memeti ka theksuar se kritika e saj nuk është e drejtuar ndaj individëve, por ka për qëllim përmirësimin e shërbimeve shëndetësore.
“Duhet ta duam dhe ta mbështesim shëndetësinë publike. Por pikërisht sepse është e jona, duhet edhe të kërkojmë llogari për të”, ka shkruar ajo.