Kryeinspektori i Inspektoratit Farmaceutik Dr. Shaban Osmanaj, ka reaguar ndaj disa deklaratave të neuropsikiatrit Dr. Jusuf Ulaj, i cili alarmoi për përdorimin e barnave me banderola të Serbisë.
Ulaj në postimin e tij tregoi se në dy raste pacientët përdornin barna nga Serbia, të cilat nuk dihet si kanë ardhur në Kosovë. Ai i bëri thirrje edhe Inspektoratit Farmaceutik që të merret me rastin dhe të kryej obligimin e tyre ligjor, shkruan Gazeta Shneta.
Por Osmanaj thotë se institucioni të cilin e drejton është marr me qindra raste të tilla. Madje ai ka deklaruar në reagimin e tij se IF ka gjobitur 130 individ, barnatore dhe depo farmaceutike për shkak të barnave me banderola të Serbisë.
Reagimi i plotë nga Osmanaj:
Ftesë publike të nderuarit Prof dr Jusuf Ulaj.
I nderuar Dr. Ulaj, duke lexuar me vëmendje shqetësimin tuaj lidhur me medikamentet me banderola të Republikës së Serbisë që ka përdorur pacienti i juaj dhe dyshimin se ato mund të jenë të transportuar në Kosovë në formë ilegale, me qëllim të parandalimit dhe luftimit të kësaj dukurie që mund të paraqet ndër të tjera dhe rrezik për shëndetin e pacientit, së pari është dashur të na njoftoni në forma tjera Ne si organ mbikëqyrës pra Inspektoratin Farmaceutik.
Me gjithat, ju ftoj që të na jepni të dhëna më në detaje lidhur me rastin në fjalë.
Lidhur me konstatimin tuaj se për ketë është dashur të dal Inspektorati Farmaceutik, ju vej në dijeni se në momentin e parë kur ne kemi një informatë të tillë veprojmë menjëherë dhe ky konstatim i juaj për IF nuk qëndron.
Ju vejmë në dijeni qe vetëm brenda këtij 9 mujori, Inspektorati Farmaceutik ka marre masa ndëshkuese në më shumë se 130 raste duke gjobitur Individ, barnatore dhe depo farmaceutike, ku në shumicën e këtyre rasteve kemi hasur në produkte ilegale (pra me banderola të Serbisë).
Për fund, duke çmuar punën tuaj prej profesionisti, ju bej dhe një herë ftesë publike që për çdo rast të tillë të na ndihmoni me informata.
Në ruajtje të shëndetit të publikut, gjithmonë në gatishmëri!