Mikrobiologu Lul Raka ka deklaruar se duhet të rishikohen masat kufizuese pas rënies së rasteve pozitive.
Raka ka deklaruar se numrit të rasteve të reja pozitive në Kosovë ka ndodhur nga shumë faktorë. Sipas tij zbatimi i masave nga qytetarët, ulja e kontaktit të njerëzve, qëndrimi në hapësira të hapura dhe vaksinimi i të moshuarve ka bërë që të ketë rënie të rasteve pozitive.
Mikrobiologu ka thënë për Express se krahas përshpejtimit të dinamikës së vaksinimit, është koha që të ketë edhe rishikim të masave kufizuese.
“Ajo që na pret ditëve në vijim është përshpejtimi i dinamikës së vaksinimit, që mund të ketë rol shumë të rëndësishëm në përballjen me pandeminë. Konform situatës së posakrijuar dhe duke marrë në konsideratë mirëqenien socio-ekonomike dhe shëndetin mental, mendoj se është koha e rishikimit të masave kufizuese. Po ashtu, nevojitet një partneritet i sinqertë dhe bashkëpërgjegjësi mes lidershipit dhe popullatës në këtë përballje, që do të lehtësonte rrugën drejt rikthimit të shumë aktiviteteve vitale për shoqërinë. Kujdesi duhet vazhduar edhe më tej në mënyrë që rritja eventuale e rasteve të reja të jetë e menaxhueshme nga institucionet shëndetësore”, ka deklaruar Raka.
