Agjencia Rregullatore e Medikamenteve dhe Produkteve Shëndetësore në Mbretërinë e Bashkuar (MHRA), ka autorizuar përdorimin e vaksinës COVID, Pfizer/BioNTech për fëmijët e moshës 12 deri në 15 vjeç në vend.
“Ne kemi rishikuar me kujdes të dhënat e provave klinike tek fëmijët e moshës 12 deri në 15 vjeç dhe kemi arritur në përfundimin se vaksina Pfizer / BioNTech është e sigurt dhe efektive në këtë grupmoshë dhe se përfitimet e kësaj vaksine tejkalojnë çdo rrezik”, tha shefe ekzekutive e agjencisë, Dr. June Raine.
Ky rekomandim pason nga një vendim në Francë, për të filluar vaksinimin e adoleshentëve të moshës 12 deri në 18 vjeç me vaksinën Pfizer/BioNTech, shkruan CNN përcjell Gazeta Shneta.
Sipas një deklarate nga agjencia në fjalë më shumë se 2,000 fëmijë midis 12 deri në 15 vjeç ishin përfshirë në studim si pjesë e provave klinike të rastësishme të kontrolluara me placebo.
“Të dhënat mbi antitrupat neutralizues treguan se vaksina funksionon në të njëjtin nivel siç shihet tek personat e moshës 16-25 vjeç”, tha të premten profesori Munir Pirmohamed, kryetar i komisionit për mjekësinë humane.
“Këto janë rezultate jashtëzakonisht pozitive”, shtoi ai.
Agjencia Rregullatore e Medikamenteve dhe Produkteve Shëndetësore thotë se do të vazhdojë të vëzhgojë në mënyrë rigoroze çdo efekt anësor të dyshuar që lidhet me përdorimin e vaksinës në këtë grupmoshë.
Administrata Amerikane e Ushqimit dhe Barnave (FDA), zgjeroi autorizimin e përdorimit emergjent për vaksinën Pfizer muajin e kaluar për të përfshirë të rinjtë e moshës 12 deri në 15 vjeç. /Gazeta Shneta/