Në Poloni, vazektomia po bëhet gjithnjë e më e famshme si një metodë e përhershme kontracepsioni për meshkujt.
Sipas një raporti për gjendjen e të rinjve në vitin 2025, rreth 15 për qind e personave të lindur mes viteve 1995 dhe 2006 nuk kanë fëmijë dhe as nuk planifikojnë të kenë në të ardhmen. Për këtë arsye, disa prej tyre janë quajtur edhe “brezi i fundit të botës” ose “brezi i katastrofës klimatike”, raporton Euronews Health transmeton Gazeta Shneta.
Ndërkohë, format e përhershme të kontracepsionit po fitojnë më shumë interes.
Në Poloni kryhen rreth 5,000 vazektomi çdo vit, megjithëse statistika të sakta nga Fondi Kombëtar i Shëndetësisë mungojnë, pasi shumica e procedurave realizohen në klinika private. Shërbimet shpesh reklamohen në internet dhe në tabela reklamuese përgjatë rrugëve.
Mateusz Siwik, pronar i një klinike vazektomie në Varshavë, deklaron se kërkesa për këtë procedurë është rritur ndjeshëm vitet e fundit. Sipas tij, interesi rritet me rreth 15 për qind çdo vit. Ai thekson se kjo rritje lidhet kryesisht me informimin më të madh të publikut dhe me thyerjen e stereotipeve shoqërore.
Shumica e pacientëve janë meshkuj në marrëdhënie të qëndrueshme, shpesh me dy ose më shumë fëmijë, të cilët kanë vendosur me vetëdije të mos zgjerojnë më familjen.
Një shembull është Kamil Pawelski, psikolog dhe influencer i njohur në Poloni, i cili bëri vazektomi në vitin 2020, dy vjet pas lindjes së fëmijës së tij të dytë.
Ai thotë se vendimi u mor për të shmangur trajtimet hormonale për bashkëshorten e tij dhe për shkak se nuk dëshironin më fëmijë. Sipas tij, kjo është një vendim i përgjegjshëm dhe shumë mashkullor, por jo i përshtatshëm për ata që planifikojnë të kenë fëmijë në të ardhmen. /Gazeta Shneta/